New Zealandimit savaaqqanik tikisitsineq Narsami suliffissanik 12-inik pilersitsisoq
Ungasissorsuarminngaanneeraluartullu KNI naapertorlugu tamanna akilersinnaalluarpoq, savaaqqanimmi New Zealandimeersunik eqqussinikkut toqoraaviup piffissami tunisassiassaaleqiffiusumi matoqqanissaralua pinngitsoortinneqarmat.
- Savaaqqat neqaannik tunisassiat piumaneqarnerat annertusiartuinnartoq minnerunngitsumillu suliffissuarmi suliassaqartitsinerup ingerlatiinnarnissaa pissutigalugit savaaqqanik New Zealandimit tikisitsiniarluta aalajangerpugut. Pingaarpoq erseqqissaatigisaallugu savaaqqanik New Zealandimeersunik pisiortornerput immikkut ittumik iluanaaruteqarfiginnginnatsigu, tunngaviatigummi eqqussuinermi akitsuutinik akiliisussaagatta, Neqimi pisortaaneq, Per Jensen, tusagassiorfinnut nalunaaruteqarluni taama allappoq.
Savaaqqanik qaammatit pingasut ingerlanerini eqqussuisoqarnerani inuit katillugit aqqaneq-marluk suliffissaqartinneqarput.
