New Zealandimi qeqertaq innermik anitsimmat inuit tallimat ajunaartut
![](/sites/default/files/styles/image_934x467/public/article_images/20191209-083012-l_2mb.jpg?itok=P4V1fVrF)
![](/sites/default/files/styles/image_934x467/public/article_images/20191209-074036-l_1mb.jpg?itok=BxGk5Cr8)
Innermik anitsisartoq sapaatit akunneri arlallit ikkulussinnarluni ataasinngornermi anitsivoq. Qeqertaq White Island inoqarfiunngitsoq New Zealandimit 50 kilomiiterinik ungasitsigisumiippoq.
Qaqqaq innermik anitsimmat inuit 50-it qeqertamiinngikkunik qeqertap eqqaaniissimasut, politiit ilisimatitsissutigaat. Siusinnerusukkut oqaatigineqaraluarpoq inuit 100-t missaanniittut.
- Inuit ilaat qeqertamiissimasut allamut qimagutsinneqareerput inuilli arlallit suli qeqertamiissangatinneqarput, tamannali suli iluamik nassuiatissarsinngilarput, New Zealandimi politiineersoq oqarpoq.
Maqaasineqartut ilaat takornariaapput.
Nunap inuinik illersuisut pisortaata tusagassiortunut katersuutitsinermi oqaatigaa, inuit 23-t annaanneqarsimasut, inuillu 27-t suli maqaasineqaratarsinnaasut.
Politiit annaassiniartartullu qeqertamukartinnissaat suli navianarpoq, qeqertamukarsinnaanissatsinnulli suli sulissuteqarluta, politiineersoq oqarpoq.
Uagut nalunaaqutarput malillugu nal. tallimat qaangerlugit tanneq sisamanngulersoq inuk ataaseq ajunaarsimasoq nalunaarutigineqarpoq maannali ajunaartut tallimanngorsimasut nalunaarutigineqarpoq.
- Pisumut alianartumut eqqugaasunut tamanut misiginneqataavugut, New Zealands ministeriuneq, Jacinda Ardern oqarpoq.
Reuters taamaa allaaserisaqarpoq.
Qeqertaq White Island ukiut taamaasa takornarianit 10.000-init takornariaqarneqarttarpoq