New Yorkimi Berlinimilu arpaqatigiinnissaraluit coronavirus pissutigalugu taamaatinneqartut

New York City Marathonimik aamma Berlin Marathonimik aaqqissuussisut 2020-mi arpatsitsinissamut pilersaarutit coronavirus pissutigalugu taamaatinniarlugit aalajangerput.

Arpannerit taakku World Marathon Majorip ilagaat, tassani maratonimik ukiumut arpannerit arfinillit ilaapput.

53.640-t New Yorkimi 44.064-illu Berlinimi siorna arpaqataapput.

- Ukioq manna New York City Marathonertitsinissaraluatsinnik taamaatitsiinnartariaqarnerput peqataasussanut tamanut pakatsinartorujussuuvoq, kisianni peqqinnissaq isumannaallisaanerlu eqqarsaatigalugit taamaatitsisariaqarnerput pisariaqartoq miserratissaanngilaq. Arpaqatigiinnissamik aaqqissuussinermi pisortaq Michael Capiraso Reuters naapertorlugu taama oqarpoq.

AAMMA ATUARUK New Yorkimi coronavirusimik marsimili aatsaavissuaq toqquteqartoqanngitsoq

Berlinimi septemberimi arpaqatigiinnissaraluaq taamaatinneqartoq taassuminnga aaqqissuussisut nalunaarutigereernikuuaat, pingasunngormalli aatsaat taamaativinneqarluni.

Londonimi arpaqatigiittoqarnissaanut suli neriunaateqarpoq, tamanna apriilip ulluisa 26-annit oktobarip sisamaanut kinguartinneqarpoq.