Netanyahu USA-mukarsinnaassanngilaq
Israelip atomimik nukissiorfii eqqornerusumik atomimik sakkussianit tunngaveqarnersut Tyrkiap Egyptenillu apeqqutigerusukkaluarpaat. Taama nalunaarpoq Jerusalemimi naalakkersuisut atorfilittaasa pisortaat. Netanyahumut taarsiullugu Israelip ministeriunerata tullia ataatsimiinnermi peqataassaaq.
Nunat tamalaat politikkeqarnerat pillugu professori Sten Ryning naliliivoq ministeriunerup suna pissutigalugu angerlarsimaannarniarluni toqqaasimanersoq.
Taamaaliorpoq pissutigalugu Israelip politikkia pigiinnarniaramiuk, tassalu Israel sakkussiat piginerlugit akuersaanngikkaluartoq taamaattoq pigisaqarmat, pissutigalugu Israelip oqaluttuarisaanerani nunat eqqaamiorisaasa akuersaarsimanngimmassuk sorsunnikkut saassunneqartaramik. Israelimut tamanna imminut illersorniarniarnertut sammitinneqarpoq, kisiannili Tyrkiap Egyptenillu tamanna mumillugu Israel ajornartorsiutinngortippaat akuerisaanngitsumik naalagaaffiummat akuerisaanngitsunillu sakkussiaateqarmat.
Sunarpiaq pillugu Tyrkiamiut Egyptenimiullu taamatut isornartorsiuerpaluttumik apeqquteqarnersut Sten Ryning aperineqarami akivoq:
- Tassa taakkua Kangiani Qiterlermi oqallinneq mumissinnaagamikku Arabiamiullu silarsuaanni ataatsimooqatigiinnerunissaq nukittorsarniaramikku, tamatumani Israelip Iran sammissallugu akerlerisamilu avissaartinniarnissaat pikkoriffigalugu, taamaalillutillu Israelip sammineqarnera atorlugu ataatsimoortitsiniarlutik.
Israelip peqataanngitsoornera isumaqatigiinniarnerni qanoq kinguneqassanersoq Sten Ryning aperiqarami akivoq:
- Isumaqarpunga Washingtonimi ataatsimeersuarnermut sunniuteqassasoq, tassami ataatsimeersuarneq suliniuteqarnissanik iluaqutaasussanik imaqarmat maannakkut piusunik sakkussamaasiveqarluni atomimillu atortussanut toqqorsiveqarnikkut isumannaatsuunissaq pilersinniarneqarluni, USA-llu ataatsimeersuarnissaq pilersaarusiorsimallugu, DR allaaserinnippoq.
