Assersuutigalugit savat nerisinnissaat akisunerulersimavoq. Nerukkaatissat akiisa akitsoriartornerannut tapiiffigineqarnissamut nunalerisut maanna qinnuteqarsinnaalerput.Assi: Visit Greenland/Franziska Mahler

Nerukkaatit akiisa qaffassutaat landskarsip akilissagaa akiliivallaartartoq

Nunalerinermi aningaasartuutit qaffakkiartupiloorput. Inatsisartut nunaatilinnut aningaasanik tapiissutit maanna amerlivaat.

Niuerniarneq akisunerulersimavoq – aamma nunatsinni nunalerisunut.

Nerukkaatit naggorissaatillugu akii ukiup ataatsip ingerlanerani pingajorarterutaat sinnerlugit akitsorsimapput – imaluunniit aningaasanngorlugit 2021-mit 4,8 millioner koruuninik.

Taama Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik ilisimatitsivoq.

Tamannalu pissutigalugu Inatsisartut Aningaasaqarnermut Akileraartarnermullu Ataatsimiititaliami ilaasortat nunalerinermut ukioq mannaannaq 5 millioner koruuninik qaavatigut aningasaliissuteqarput. Naalakkersuisut noqqaassuteqarnerat naapertorlugu aningaasaliisoqarpoq.

Kalaallit Nunaanni nunalerinermi akit qaffakkiartortut

Nunalerinermi nerukkaatinut naggorissaatinullu aningaasartuutit 2021-mut sanilliullugit 2022-mi 4,8 millioner koruuninik amerlisimapput. Tamanna 37 procentimik qaffariaataavoq.
 

Nunatsinni nunalerinermi aningaasartuutit affaasa missaat nerukkaatinut naggorissaatinullu atorneqartarput.


Akit pingaartumik Ukrainemi sorsunnerup coronallu tuniluunnerata nassatarisaannik qaffapput, pisut taakku nunarsuarmi nioqqutit ikilinerannik nassataqarlutik, nerukkaatit naggorissaatillu ilanngullugit.

 

Tusarfik: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik

- Tapiissutit amerlinerisigut nunalerinermik inuussutissarsiuteqartut ajornartoornermit sapinngisamik pitsaanerpaamik qaangiinissaat qulakkiissavarput. Siunissami taamatut pisoqaqqunagu immikkoortuni taakkunani akitsuutit apparneqarnissaat Naalakkersuisut nunalerinermik inuussutissarsiuteqartut suleqatigalugit sulissutigaat, nunalerinermut, imminut pilersornermut, nukissiutinut avatangiisinullu naalakkersuisoq, Kalistat Lund, oqarpoq.

AAMMA ATUARUK Ataatsimut isigalugu: Nioqqutissat qulit uku akitsornerpaapput

Nunalerineq avatangiisinut mingutsitsinnginnerussaaq

Nerukkaatinut naggorissaatinullu akitsuutit aappaagu apparneqassapput nerukkaatissat ullumikkumut sanilliullugit najukkami annertunerusumillu tunisassiarinerisigut. Tamanna pissaaq narsaatit annertunerulersinnerisigut narsaatinilu naatitsisarnerup sunniuteqarnerulersinneratigut.

Ilutigitillugu nunalerisut arlaqartut akisuumik mingutsitsisumillu dieselitortumik nukissiutaat erngup nukinganik seqerngullu qinngorneranit nukissiorfeeqqanut taarserneqassallutik, Kalistat Lund oqarpoq.

Aningaasat tunniunneqassapput nunalerisut Namminersorlutik Oqartussanut qinnuteqarnerisigut. Tamanna qanorpiaq pissanersoq Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit Savaatillit Peqatigiit Suleqatigiissut aamma Nunalerinermik Siunnersorteqarfik peqatigalugit paasiniarneqaleruttorpoq.

Nunalerisulli qinnuteqaataat savaaqqanik nersutinillu tunisaasa amerlassusaat pisortatigoortut toqoraavimmeersut aallaavigalugit nalilersorneqassasut naalakkersuisoqarfik ilisimatitsivoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl