Nersutaatit qulliarnermik nappaatillit virusimik laboratoriamiit tunillanneqarsimapput

Uumasut nappaataannik qulliarnermik, imaluunniit seerisoornermik, Tuluit Nunaata kujataata kippasissuani kingumut naammattoorsisoqartoq ippassaq Radioavisimi oqaluttuaraarput. EU-Kommissionillu ullumi uppernarsarpaa uumasunik misissuiffimmi virusit ilaannit nersutaatit tunillanneqarsimasut.
aggustip 05-at 2007 13:19

Naasorissaasup eqqugaasup illuaniit kilometerinik arlaqanngitsunnguanik ungasitsigisumi uumasunik misissuiffeqarpoq, misissuiffillu taanna ungasinngitsukkut nakorsaasiorsimavoq, tassa uumasut nappaataat taanna siooragineqaqisoq akiorniarlugu, killormorluinnarli pisoqarpoq, tassami nersussuit nappaammik eqqugaapput.

Nersussuarnik, neqaannik immummillu avammut tuniniaaneq ippassamiit inerteqqutaalerpoq.

Pisoq Tuluit Nunaanni naalakkersuisunit ilungersunartutut isigineqarpoq. Ministeriunerup Gordon Brownip feriarnini kipitiinnarpaa, ajornartoorfiit anigorniarlugit ataatsimiinnerni peqataajumalluni.

Naalakkersuisut nalunaareerput 2001-imisut pisoqaqqinnissaa sapinngisamik pinngitsoortinniaritsik, taamanikkummi qulliarnermik nappaalasoqallarmat nersutaatit 7 millionit toqunneqartariaqarsimapput ikuallanneqarlutillu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq