Nersussuup nilernera ataaseq 600 koruuninik akileraaruseqquaat

Qallunaat nunaanni nersussuit puulukillu nissaallutillu nilertut akileraarutitigut akiliisinneqartalernissaat akileraartarneq ataatsimiititaliarsuup siunnersuutigaa.
Allattoq Lotte Holm
februaarip 09-at 2009 12:40

Siunnersuut akuerineqarpat nersutaatillip ukiumut aningaasartuutai annertusingaatsiassapput, aviisi Dagbladet Holstebro-Struer taamatut allaaserisaqarpoq.

Nersussuit pigisakka eqqarsaatigissagukkit taakkua nilernerinut ukiumut 535.000,00 koruuninik akiliisalissaanga nersutaatilik oqaluttuarpoq.

Nersussuit puulukillu nilernerinit nissaannerinillu silaannaq aniatinneqartoq taaguuteqarpoq metangas, akileraartarnermullu ataatsimiititaliarsuup siunnersuutaa malillugu nersussuup nilernera ataaseq 600 koruuninik akiliutigineqartarnissaa siunnersuutigineqarpoq.

Siunnersuut piviusunngortinneqarpat, Danmarkimi puulukit nersussuillu ikinnerulernissaat ataatsimiititaliarsuarmit naatsorsuutigineqarpoq.

Nersussuit puulukillu nilertarnerisa nissaattarnerisalu akileraarusersorniarneqarnerat nersutaatilimmit naammagineqanngilaq.

Nersussuit nissaallutillu nillaasarput akitsuuserneqarnissartik eqqarsaatiginagu, tamannami soqutiginngilluinnarpaat nersutaatilik mamiatsassimaqisoq oqaluttuarpoq.

Sulili knr.gl-imit tusagaqanngilagut savat tuttut umimmaallu nilertut akileraarusersorniarneqassanersut.