Nersussuup neqaa nunatsinneersoq takkutingajalerpoq
Argentinamiut brasiliamiulluunniit nersussuaataat sumiluunnit eqqartorneqaleraangata kikkorpassuit illigullutik nuakoortarunarput.
Nersussuilli neqaat Nunatsinneersut neqinngersunit ukiorpassuit immaqa qaangiutinngitsut pilernguneqartalissasut?
Nersussuup neqaanik Kujataaneersumik ussiinissannut Nuummi neriniartarfiit ilaanni, Hotel Hans Egede-mi, tallimanngorpat arfininngorpallu periarfissaqarputit. Nersussuup neqaanik 550 kiilumik Neqi A/S-iminngaaniit Hotel Hans Egede tikisitsisimavoq. Nersussuit taakku misileraavimmi Upernaviarsummi qaqqani alliartorsimapput, naggorissaaserneqanngitsunik ivigartorusaartarsimallutik.
Nunalerinermut Kujataani siunnersorti, Aqqalooraq Frederiksen, oqaluttuarpoq, savaateqarnerup saniatigut nersussuaateqarnerup misilinnissaa neriuuteqarfigilluaritsik. Savaatillit arlallit nersussuaateqalereerput, aallartilluarnissatsinnulli aningaasaliisussanik amigaateqarpugut – taamaatiinnarnavianngilagulli, Aqqalooraq Frederiksen oqarpoq
Nersussuup neqaanit nunatsinninngaaneersumit suummita neqeroorutigineqarsinnaappat?
Nersussuup neqaanik suppaliaq rubiiartalik kissavaasartalillu… neqimik nersussuup ilutaaneersumit siataq kakillarnap paarnaanik akusaq, tungusunnitsortalerlugu, nersussuup neqaa tarajorterlugu uninngatitaq, sivisuumik uutaq, taanna siinuppilerlugu allanillu akoorlugu…
