Nersornaat sølviusoq agguaanneqarpoq

Elisa Nuko Tasiilameersoq aamma Torben Harald Alne Nuummeersoq Nersornaammik sølviusumik Inatsisartut Siulittaasoqarfiannit ataqqinaaserneqarput.
septembarip 07-at 2011 16:21

Elisa Nuko nunatsinni kulturikkut tunngasutigut piffissami sivisuumi annertuumik pingaaruteqartumillu tunniussaqarsimanera nersornaaserneqarneranut tunngavigineqarpoq.

Siulittaasoq Josef Motzfeldt ilaatigut ima oqarpoq:

- Tasiilami erinarsoqatigiinni assigiinngitsuni ukiut ingerlanerini peqataasarsimavutit kingullertigullu erinarsoqatigiit Kangiata Akisunnera aamma ilaasortaaffigilersimallugit. Erinagilluinnartumik tusarnersumillu nipeqarnerit erinarsoqatigiinni immikkuullarissutigaat tamannalu Tunumiut nipaannut tusarningaartumut tiguartinnartumik tusarnaartakkatsinnut ilisarnaatitut oqaatigisariaqarpoq.

Torben Harald Alnep perorsaanermik suliaqarnermini kulturitta paasineqarnissaa eqqarsaatigalugu nunatsinnut piffissami sivisuumi annertuumik pingaaruteqartumillu tunniussaqarsimanera nersornaasiinermi tunngavilersuutigineqarpoq.

Siulittaasup Torben Harald Alnemut oqaaseqarnermini makku erseqqisarpai:

- 1972-imi Nuummi ilinniartut ineqarfianni nunatsinni atorfineqqaarninniilli meeqqat pitsaanerusunik atugaqalernissaat qasujuillutit sulissutigisimavat. 1975-imi Nuummi Meeqqat Illuata pilersinneqarneraniit taamatuttaaq angerlarsimaffimmut tassunga pisortatut perorsaariaatsimik ineriartortitsisimavutit.

- Nunatsinni perorsaariaatsimik ineriartortitsininni nunatta pinngortitaassusianit inuiaqatigiinnilu kulturikkut pingaartitanit sunnerneqarsimavutit. Tamanna aamma pissutaaqataanngitsuugunanngilaq sulinikkut meeqqap qitiutinnissaa aamma iluatsissimagakku, tamannalu aqqutigalugu meeqqat kulturikkut kinaassusiat kinaassutsiminnillu tulluusimaarutiginninnerat aalajangiusimallugulu nukittorsartarsinnaasimavat. Pitsaanerpaavorlu tamanna maani nunami namminermi ingerlanneqartarsimammat.