Nersornaat kimeqartinniarneruneqarpoq
Ukioq manna, ukioq kingullerlu Nersornaammik saqqarmiuliinerit tamarmik immikkut pingasuupput. Ukiumut kuulti ataaseq, sølvillu marluk tunniunneqarlutik.
- Nersornaatit tunniunneqartartut sølviusut guldtiusullu, kimeeruttoortinneqannginnissat pingaaruteqarpoq. Taamaammat inuk inuiaqatigiinnut sunniuteqarluartumik suliaqarsimasoq, ataqqinaatitut nersornaatisisarnissaa pingaaruteqarpoq, Josef Motzfeldt oqarpoq.
Inatsisartut siulittaasuat, Josef Motzfeldt, nassuiaavoq, Inatsisartut siulittaasoqarfiat nutaamik aalajangersaasimasoq Nersornaat ukiumut annerpaamik sølvit tallimat guldterlu ataaseq tunniunneqartalissasoq.
Siornatigut Nersornaatinik tunniussisarneq taava kimeqarsimanngitsuusoraajuk?
- Soorunami nersorniarneqartutut nersornaammillu tunisariaqartutut isigisimasatit inassuteqaatigineqarsimasullu, taamanikkut aalajangiisartunit toqqammavigineqarsimappata, taava isumaqanngilanga uagut uparuartussallugu pissuteqassalluta, Inatsisartut siulittaasuat Josef Motzfeldt oqarpoq.
Nersornaat 1989-imili tunniunneqartalerpoq, taamanikkut Namminersornerulernerup ukiunik qulinngortorsiorneranut atatillugu, katillugit nersornaatit 31-it tunniunneqarlutik. Tassa ukioq mannamiit quleriaammik amerlanerullutik.
Inatsisartut siulittaasuat Josef Motzfeldt KNR-imit aperaarput, nammineq siulini 30-it tikillugit Nersornaatinik tunniussisarsimaneri qanoq isumaqarfiginerai:
- Isumaqarpunga taamanikkut aalajangersaasartut taanna akisussaaffigigaat. Uanga ukiut 10-it matuma siorna pisimasut oqaaseqarfigisinnaanngilakka, Josef Motzfeldt oqarpoq.
Ruth Heilmann KNR-imit aperaarput, sooq Siumukkut naalakkersuisuutitaqarnerisa nalaani Nersornaatit 30-it tikillugit ukiumut tunniunneqartarsimanersut:
- Tamanna oqaaseqarfigiuminaatsippara, tamannami siulittaasoqarfiup partiinit tamanit aallartitaqarfiusup aalajangersartarpaa. Imaanngilaq Siumut partiaata kisimi kikkut Nersornaaserneqassanersut aalajangersartaraa, Ruth Heilmann oqarpoq.
