Nunat Avannarliit Siunnersuisoqatigiiffiata atuakkiortunut aappaagumut nersornaasiinissaanut nunat avannarliit tamarmik inassuteqarput. Inassutigineqartunut ilaavoq, nunatsinni eqqumiitsuliortoq atuakkiortorlu: Julie Edel Hardenberg. Taassuma atuakkiaa nersornaasiinermut tunngasuissatut piukkunneqarsimavoq, taaguuteqartoq: Nipaatsumik Assigiinngisitaarneq.
Assilisat atorlugit saqqummersitat kiisalu kulturi kinaassuserlu pillugit oqallisissiaq atuakkami tassani saqqummiunneqarput.
Nunat Avannarliit Siunnersuisoqatigiiffianut inassutigineqartut katillugit aqqaneq-marluupput, nunatta saniatigut Danmark, Finland, Island, Norge, Sverige Samisullu oqaasillit inassuteqarsimallutik.
Atuakkat sammineqartut assigiinngitsuupput, taallat, oqaluttualiat, inuunermik oqaluttuat kiisalu assit katersukkat oqallisissiartallit inassutigineqartunut ilaapput.
Nersornaasigassamik aalajangersaaneq Oslo-mi februaarip 24-ani pissaaq, tunniussinerli 350.000 koruuninik aningaasartalik Københavnimi oktober-novemberimi pissalluni.