Nerrivimmi arsaarartut medaaliannattuupput
Issittumi nunallit Canadami unammiuaaqatigiinneranni, Arctic Winter Gamesimi, kalaallit medaaliannaqattaartuarsinnarput. Nerrivimmi arsaarartut kingumut medaaliannattuupput. Sølvit pingasut bronzelu ataaseq iligiit marlukkuutaarneranni medaaliannattoqarluni.
marsip 11-at 2010 05:49
Kalaallit timersortartut tallimanik ippassaq medaaliannapput - sølvit pingasut bronzellu marluk, Timersortartut Kattuffiata nittaartagaani tamanna atuarneqarsinnaavoq.
Angutini inuusunnerni angajullerni Anders Jensen aamma Liilu Kleist sølvinnapput. Angutini inuusunnerni nukarlerni Karl Wille aamma Siverth Olsen sølvinnapput. Arnani inuusunnerni nukarlerni Maren Jensen Maaliaanna Willelu aamma sølvinnallutik.
Soralu Lorentzen aamma Abelone Petersen bronzennapput, bronzennattaallu aappaa sisorarluni freestylernermi Emil Olsenimit pissarsiarineqarluni.
Issittumi nunallit unammiuaarnerat maanna qiteqquppoq, kalaallillu manna tikillugu sisamanik kuultinnapput, arfineq-marlunnik sølvinnallutik bronzellu sisamat.
