ISLAND GAMES Nerrivimmi arsaarartartut ujaminnattut

Kalaallit nerrivimmi arsaarartartui ippassaq Gotlandimi semifinaalimi Ålandimut ajugaareerlutik Island Gamesimi ujaminnannissartik qulakkeereerpaat, tassami finaalertussanngorput. 

Ataasinngornermi kalaallit Ålandimut semifinaalermata aallartilluaqaat. Tassani Poul Jørgen Petersen aamma Ivik Nielsen unammilluaqaat. Unammineq naligiiffiuvoq, kalaallilli 4-3-mik ajugaallutik. Taamaalillutillu finaalimut anngullutik. 

Taamaalillutik Guernsey, unammisaqattaarnerit aallartinneranni ajugaaffiginikuusaat, finaalimi unammisussanngorpaat. Guernseyikkullu qularnanngitsumik tamaviaassasut kalaallit sungiusaasuata, Tommy Jørgensenip, qularinngilaa.

- Finaalimi unammineq allaanerussaaq. Guernseyikkut ajugaarusullutik tamaviaassapput. Unammisartuttali finaalernissaat pissusissamisoorpoq, tassami unammilluarnikooqaat. Ivik Nielsen, Aqqalu Nielsen, Poul Jørgen Petersen, Karlinannguaq Lundblad, Rosa-Marie Petersen aamma Melissa Larsen unammilluarnikooqaat. Hugo Svensson, Arne Hermann unammisartullu ataqatigiilluarneratigut angusarissaarpugut, Tommy Jørgensen oqarpoq. .

Nunatta nalunaaqutaa malillugu ullaap tungaa finaalissapput.  

AAMMA ATUARUK Kalaallit Island Gamesimut piareertut

AAMMA ATUARUK Unammisartut arnartaat piariilersut