Nerrivimmi arsaarartartut Savalimmiuni angusarissaartut

Nunanut allanut unammisartut sungiusaasuata Tommy Jørgensenip oqaatigaa kalaallit unammisartui holditut pitsaasumik qaffasissumillu unammisaqattaarsimasut, unammisartullu inersimasut aatsaat taama unammilluartigitillugit takusimanerarpai. Taamaattumik ukiunut tulliuttunut assut isumalluarnerarpoq.

Arnat angutillu akuleriillutik iligiiaarneranni, tassa mixed double-imi, kalaallit annguttut Sivkersok Gärtner aamma Julius Anike, immikkut tupaallaatissatut taasariaqarsorai, tassami taakku ilimagineqartut arlallit ajugaaffigeqattaaramikkit, pissartanngorniunnermilu Islandimiut pitsaanersaannut ajorsalaaginnarsimallutik.

- Naatsumik oqaatigalugu unammiat angusaat kattuffimmiit naammagisimaarneqarput, tassami kalaallit unammisartui unammersuarnerup ingerlanerani unammissutini assigiinngitsuni arfinileriarlutik finalimut anngupput, tassani kuulti ataaseq, siilvit tallimat bronzellu arfinillit, Nerrivimmi Arsaarartartut Kattuffianni siulittaasoq Emil Kleemann tusagassiuutinut nalunaarummi ilaatigut allappoq.