Nerrivimmi arsaararluni Top 12-imut anngunniunnermi kalaallit peqataasut ingerlalluarput
Køgemi annguniuttoqarnerani angutit inersimasut, nukappiaqqat angajulliit, U21/arnat inersimasut arnallu inuusunnerit unammipput. Kalaallit peqataasut sapinngisartik tamaat unammipput angusarissaarlutillu.
-Kalaallit nerrivimmi arsaarartartut iluatsitsilluarnerat nuannaarutigaara, Nukannguaq Søholmili immaqalu aamma Maaliaanna Wille imaannaanngitsumik suliassaqalissapput. Unamminerit sakkortussapput unammilleqatigiinnerlu aamma sakkortuupilussuussalluni. Peqatigitilluguli misigisaqalaavissussapput, aamma Dansk Top 12-imut kalaallit peqataatitaasa pingajussaattut inissinneq Nukannguamut torralaavissorpoq, nunanut allanut unammisartut sungiusaasuat Tommy Jørgensen oqaluttuarpoq.
Nivissat kalaallit Top 12-ertoqarnerani naapissinnaasaasa ilagaat danskit nunanut allanut unammisartuat, Stephanie Christensen, taamaammat unammiuaarnermi peqataasunut allanut aamma unammilligassaqarluarpoq.
- Kalaallit nerrivimmi arsaarartartut Tjele Efterskolemi atuartuusut siuariartornerat takuneqarsinnaavoq. Nerrivimmi arsaararneq atuartut atuarnerannut ilaavoq, danskillu atuartut sungiusaqatigisarnerisigut aammalu unammiuaarnernut assigiinngitsorpassuarnut peqataasarnermikkut misilittagaat amerliartorput. Nukannguup misilittakkani ineriartuutigigai qularnanngilaq, taamaalillunimi Top 12-imut annguppoq. Kalaallit nerrivimmi arsaarartartut arfiniliusut saniatigut kalaallit atuartut 20 aamma Tjele Efterskolemi atuartuupput, tassanilu atuartitsissutigineqartarput BMX, Animation, hiisterneq, eqqumiitsuliorneq atuakkiornerlu, Tommy Jørgensen nassuiaavoq.
