Nerlerit Inaannut timmisartoq kingulleq tikippoq 23 december

Nittaalluni anorersuartarnerujussua aputaajaatillu atortuisa taartissaannik amigaateqarneq pissutigalugu Nerlerit inaanni mittarfimmi suliniarneq ukiup qaammataani siullermi ajornartorsiutaavoq. Nerlerit inaannut timmisartoq kitaanit tikittoq kingulleq juulliaraq aqaguttoq 23 december tikippoq, sapaatip akunnera ataaseq kinguaattoqqareerluni.
Nerlerit Inaanni mittarfik
Allattoq Jaaku Lyberth
januaarip 31-at 2015 18:38

Timmisartortitseqatigiiffik Air Greenland  jannuaarip qaammataani Nerlerit Inaannut timmisartuussisinnaasimanngilaq  mittarfiup aputeqarpallaarnera pissutigalugu.
Nerlerit inaanni mittarfimmi  pisortap  Henrik Rosing Søltfotip nalunaarutigivaa mittarfik miffigineqarsinnaanissaminut suli piariinngitsoq,  aputeqarpallaarnerujussua pissutigalugu, naatsorsuutigineqarporlu Nerlerit Inaannut timmisartuussinerit sapaatiuppat ingerlanneqarsinnaassasut.
Silarluttuartarsimanerata saniatigut mittarfimmi aputaajaatit bulldozerit ajoquteqarlutik atorsinnaasimanngillat.
Aputaajaatit atortuisa taartissaat  21 januar aatsaat Nerlerit Inaannut tikiunneqarput.
Aputaajaatit maannakkut atorneqarsinnaaleqqipput, immikkullu ittumik suliartortitaq Nerlerit Inaannut tikippoq, aputaajaatillu  ulloq unnuarlu aputaajaasinnaalerput, mittarfiup pisortaa nalunaarpoq.
 - Nerlerit Inaanni nittaalluni anorersuaqattaartuarpoq - aputaajaatillu pigisagut naammattumik aputaajaasinnaanatik.
 Sulisut tamanna qatsulluinnarsimavaat, akunnerit amerlasuut ullorpassuillu atorlugit aputaajaatini issiasariaqartarsimapput, nittaallunilu anorersuartuarmat.
Kisiat tassa sapaatiuppat naatsorsuutigaarput mittarfik aputaajarneqarumaartoq taamaalillunilu Air Greenlandip timmisartua Dash 8 mittarfimmut missinnaajumaarluni, Henrik Rosing Søltoft oqarpoq.
Sisamanngornermi 29 januar ualikkut aputaajaaneq aallartinneqaqqippoq  anorersuarnerata kingorna, aput piaarneqartoq 20.000 kubikmeterisut annertutigivoq.
Taamaalilluni mittarfik  1.000 meterisut takitigisup ilaa 800 meteri atorneqarsinnaavoq timmisartullu Dash 8tut ittut missinnaallutik.
Kisiat tassani timmisartoqarfiup iluttai  aamma sioraanittoq aputinik ulikkaarput.
Aputeqangaarmat akunnittarfik takuneqarsinnaanngingajappoq,  timmisartullu inissinneqartarfiata hangarip eqqaani aputeqangaarmat aput timmisartut inissinneqartarfiatut portutigaluni.  
Timmisartunut mittarfik tamakkiisumik atorneqalernissaannut  aput 40.000 kubikmeterisut annertutigisoq piaarneqaqqaartariaqartoq, mittarfimmi pisortaq oqarpoq.