Neriuffiup siulittaasua katersiniarnerup aallakaatinneqannginnerani: Tapiissutit tamarmik isumaqarput
Nappaammik kræftemik akiuiniarfik Neriuffik nuna tamakkerlugu anigaasaanik katersuiniarnera unnugu KNR-TV-ikkut toqqqaannartumik aallakaatinneqassaaq.
Neriuffiup siulitaasuata Mette Sofie Jørgensenip coronamik ajornartorsiorneq pissutigalugu katersuiniarneq sunniuteqassangatippaa.
- Corona pissutigalugu aningaasaqarniarnikkut nunatsinni arlaatigut kalluaanikuugami, taamaammallu tuniserusuttut immaqa annikinnerusumik tuniserusunnissaat naatsorsuutigaara nammineerlunga, Mette Sofie Jørgensen oqarpoq.
Aningaasat siorna katersorneqartut 3.252.133 koruuniupput.
- Aningaasat katersorneqartut kræftemik eqqugaasunut taakkualu ilaqutaannut tapiissutigineqassapput aamma oqaloqatiginnittartunut pikkorissaanikkut, immikkoortortaqarfiit anginerusunngortinneqarnissaannut, ilaqutaasut qanigisaallu tapiiffigineqarnissaannut suliniutit atuagassiat assigissaannillu saqqummersinneqarnissaannut katersorneqartunut atorneqartarput, Mette Sofie Jørgensen oqarpoq.
Nunat avannarliit kræfteqartut kisitsisaataannik katersuiffimi NORDCANimi kisitsit naapertorlugit Kalaallit Nunaanni ukiumut kræfteqalersartut 200-it missaanniittarput ukiumullu toqusartut 110 -it missaaniillutik.
Kræfteqartunut katersuiniarneq pingaaruteqarpoq kræfteqartut qinnuteqartartut amerliartuinnaramik aamma kattuffik katersuiniarnikkut taamaallaat ingerlasinnaammat siulittaasoq oqarpoq.
- Neriuppunga , neriunnerpaarpaajuvugut tamatta, kikkulluunnit qanorluunniit annikitsisunnguamik tapiissasut, tarmarmimmi tapiissutit iluaqutaasussaammata
Neriuffimi siulittaasoq Mette Sofie Jørgensen taama oqarpoq.
Neriuffiup nuna tamakkerlugu aningaasanik katersuiniarnera KNR-TV-ikut toqqaannartumik isiginnaarneqarsinnaavoq unnugu nalunaaqutaq arfineq pingasuniit aqqarngup tungaanut. Maanakkuli ikisisoqarsinnaalereernikuulluni.
