Neriuffiup katersuiniarnera arfininngornerup unnukkuani malinnaaffigiuk

Neriuffiup kræftimik eqqugaasimasunut aningaasanik katersiniarnissaa KNR TV-kkut toqqaannartumik arfininngornerup unnukkuani nalunaaqutaq arfineq-pingasunut aallakaatinneqassaaq.

Allattoq Ane-Marie Petersen, Karsten Sommer

novembarip 03-at 2018 15:51

Aallakaatitsineq akunnernik pingasunik sivisussuseqartussaq Nuummi Kulturip illorsuani Katuami pissaaq, qilanaartuutissaqartugullu saqqummeeqataasartut ilaat Apollo Jeremiassen oqarpoq:

Appisimaartussat:
- Qiajuk Studis
- Johannes Berthelsen, Eigil Petersen peqatigalugu
- Hans Jukku Noahsen, Nathan-imiit Tupaarnamiillu peqatigineqarluni
- Tupaarnaq Ingemann Mathiassen, Hans Jukku Noahsen peqatigalugu

- Aallakaatitsinermi aliikkusersuinerit, soorlu nipilersortartut tusaamasat aliikkusersuissapput aamma qitittoqassaaq. Taassumalu saniatigut aamma isiginnaartartut SMS-eraangamik pinnatassaqarput, tamakkulu unnuup ingerlanerani paasinarsissapput qanoq ingerlanneqassanersut, Apollo Jeremiassen oqarpoq.

Aningaasanillu katersilluarnissaq pingaaruteqarnerarpaa:

- Nunatsinni kræftimik nappaateqarlutik toqusartut nunanut allanut sanilliullugu amerlanerujussuupput. Tamaammat aningaasat pisariaqartinneqarput, katersuiniarnermilu uani siuliuunut katersuiniartarnitsinnit aningaasat amerlanerunissaat neriuutigaarput, Apollo Jeremiassen oqarpoq.

Siorna katersuiniarnermi 1.672.000 koruunit katersorneqarput, ukiulli siuliini millionit pingajuat avillugu katersorneqartarnikuugaluarput.

Illit 1880-imut SMS-erlutit katersuiniarnermut tapeeqataasinnaavutit eqqugassanullu makitsinermut ilanngullut. Pinnatassat ilagaat biilit.

Aallakaatitsineq nalunaaqutaq arfineq-pingasunut allartissaaq aqqarnup tungaanut.

AAMMA ATUARUK - Vi vil skaffe et "Livsrum"

AAMMA ATUARUK Neriuffiup katersuniartitsinera arfininngornermut kinguartinneqarpoq

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.