Neriuffik: -Nunatsinni siammasippallaamik ingerlavugut

apriilip 02-at 2006 17:11

Nunatsinni kræftip akiorniarneqarnera immikkut kattuffiuvoq, Neriuffimmi siulittaasoq Theodora Kruse aperaarput, sooq Danmarkimi kattuffimmut ilaasortaannginnersut.

- 1988-minngaanniit aallartikkattali ukiut arlalipparujussuit Kræftens Bekæmpelse-mi ilaasortaasimavugut 1997-mioqqooqaaq nunarput namminiilerpoq Neriuffinngorluni, Theodora Kruse oqarpoq.

Taanna aperaarput, Danmarkimi 26,5 mio. koruuninik katersisimasoq nunatsinnilu Neriuffik qanoq ilinikkut katersisarnersoq.

- Aallartikkattali septembarimi sapaat siulleq katersiffittut atorneqartarpoq nunatsinni maani. Nalunngilarput Danmarkimi apriilimi aallartittartoq kisianni uagut nunatsinni allatut periaaseqarpugut, oqarpoq.

- Soormitaava ukiakkut?

- Imaassimagunarpoq Neriuffiit aallartimmatali ulloq taanna septembarimi sapaat siulleq taanna peqqutaarpiannguatsiarpoq. Taamaalilluni ulloq taanna ulloq ataaseq nuna tamakkerlugu katersuiniarnertut ingerlasarpoq, akivoq.

- Siorna 300.000-t sinnerlugit katersorpasi. Tamakku katersortakkasi kræftimut tunngatillugu qanoq siunertaqarlusi atortussanngortittarpisigit?

- Suliniaqatigiiffiit peqatigiiffiinnarnik tunulequtaqarlutik kattuffiat ingerlaniarsarivoq, saniatigullu allaffimmioqarluta, taamaalilluni ingerlatitsiniarneq nunatsinni oqimaatsorujussuuvoq aammalu aningaasartornartorujussuulluni naak aningaasat taakku atorneqartussat kræftimik nappaatilinnut atorneqartussaagaluartut kisianni tassa….soorunami taakkununnga aamma atorneqartarput kisianni ilaat allaffiit ingerlalluarnissaat pillugu taakkununnga atorneqartariaqartarput, Theodora Kruse oqarpoq.

- Kræftimut tunngatillugu akiuiniassagussi pitsaanerpaamillu angusaqassagussi suna siunertarisinnaavisiuk?

- Assersuutigalugu oqarsinnaavunga siunertat pitsaasut amerlasoorujussuupput suleqatigiiffiusinnaasut, taamaallaat amigaatigiinnarparput nukiit amerlasuut ataatsimut kattullutik suleqatigiinnissaat. Tassami annertoorujussuugami taavalu nunarput isorartoorujussuulluni ataasiakkaat tamani tamaani peqatigiiffeqartiterput nunarput tamakkerlugu, taamaattorli suleqatigiinniarneq immini oqimaatsutut uanga isigisinnaasarpara patsisigalugu immitsinnut ungasikkatta, taavalu illoqarfinni tamatta immikkut ingerlaniarsaraluta. Kisianni taamaakkaluartoq isumaqarpunga suleqatigiinneq pitsaasuusoq aamma tassuunaatigut. Oqarsinnaavunga atuisuusut immaqa maqaasisaraluaraatigut amerlanertigut saqqumilaannginnerujussuaq pisuulluni, sulili pitsaanerusumik ingerlariaqqissinnaasariaqassaagut siunissami, Theodora Kruse oqarpoq.