Neriuffik nittartagartaassaaq

Nappaassuarmik kræftimik akiuiniaqatigiiffik Neriuffik Nuummi ullumimiit sisamanngorneq ilanngullugu ataatsimeersualerpoq, sinerissamilu immikkoortortaqarfimmeersut siunnersuutaasa eqqartorneqarnissaasa saniatigut, kalaallisut danskisullu oqaatsit atorlugit Neriuffiup nittartagassaa pilersinneqassaaq. Neriuffimmi siulittaasoq Johanne Olsen ima oqarpoq:

- Nittartagaq nutaaq, ataatsimeersuartunut nassuiaatigiteriarlugu ammassavarput. Nittartakkami paasissutissat suulluunniit Neriuffimmut, kattuffimmut aammalu peqatigiiffinnut tunngasut tassani takuneqarsinnaalissapput. Aamma nappaatinut assigiinngutsunut paasissutissat nassaarineqarsinnaassapput, taakkualu kalaallisut danskisullu oqaasertaqartassapput. Imarisai ilaartorumaarput, Neriuffimmi siulittaasoq Johanne Olsen oqarpoq.

Sinerissamiit peqataasut katillugit 27-upput, Peqqissutsimut Naalakkersuisoq Arkalo Abelsen aamma aggersarneqarsimavoq.

Neriuffik ukiut pingasukkaarlugit ataatsimeersuartarpoq.