Neriuffik aningaasaliiffigineqarpoq
Aningaasat taakku frimærkip kusanartup nalinganit ilassutitallip 2009-imeersup tunineranit isertitaneersuupput. Frimærkimik suliarinnittoq eqqumiitsuliortoq Lis Stender oqarpoq, ”frimærkip takutippaa inneq, asanninnerlu ilaqutariit kræftimik eqqugaasut napparsimasuuteqarnerminni aqqusaartagaat”, TELE-POST-ip tusagassiutinut nalunaarutaani ilaatigut taama allaqqavoq.
TELE-POST ukiut tamaasa frimærkimik nalinganit ilassutitalimmik, siunertanut pitsaasunut iluaqutaasussamik saqqummersitsisarpoq, 2009-milu Kalaallit Nunaanni Neriuffiit Kattuffiat toqqarneqarsimavoq.
”Nuannaarutigaarput inuiaqatigiinni akisussaaqataanerput takutissinnaagatsigu, matumanilu kattuffik Kalallit Nunaanni ilaqutariinnut kræftimik eqqorneqarsimasunut annertuumik suliniuteqartoq katersuiniarnitsigut mikinngitsumik tunissuteqarfigisinnaallutigu.” Pisortaanerugallartoq Steen Montgomery-Andersen oqarpoq.
Kalaallit Nunaanni Neriuffiit Kattuffiat namminneq piumassutsiminnik suleqataasunit ingerlanneqarpoq, inuillu kræftimik eqqorneqarsimasut ikiorserneqassappata, avataaniit tunissutit pinngitsoorneqarsinnaanatik.
”Katersuiniartarnitsinni inuiaqatigiinnit taperserneqaraangatta, nukissanik nutaanik tunineqartarpugut, tamakkununngalu ilaavoq TELE-POST-ip katersuiniartarnera”, Kalaallit Nunaanni Neriuffiit Kattuffianni siulittaasoq Johanne Olsen nuannaarluni oqarpoq.
