Nerisat sinneri angerlarsimaffeqanngitsunut
Julefrokostit aallartinnginneranni kajumissaarut avammut taamatut tusarliunneqarpoq. Nalliuttorsiortoqartillugu nereqatigiinnermi nerisat sinneruttut qujarunneqarput, Nuummi angerlarsimaffeqanngitsut unnuisarfianni aqutsisoq Storm Ludvigsen oqarpoq.
Suliffeqarfiit angisuut nerisarfiini, kantiinani neriniartarfinnilu nerisassat sinneruttut aamma qujarunneqarput.
Storm Ludvigsen oqarpoq, tunniussineq tunineqarnerlu nuannersuusut.
-Nerisassat igiinnarneqarneraninngarnit ajunnginerooq tunniukkaanni, taava aningaasat atorluarneqassapput, Storm Ludvigsen oqarpoq.
Nerisat sinnerinik unnuisarfimmit aallertoqarsinnaanngilaq, taamaattorli tunniusserusuttut Nuukullak 18-mut aggiussisinnaapput.
Nuummi taxanik ingerlatsisartoq Nuuk Taxi suliniummut tapersersuilluni nerisassat akeqanngitsumik Unnuisarfimmut angallattarniarpai.
Unnuisarfik ullut tamaasa unnukkut nalunaaqutaq 20:30 ammartarpoq sulisullu pajuttunik tigusinissaminnut piareersimassapput.
