Nerisassiullaqqissut

Innuussutissat pillugit Narsami ulluni pingasuni isumasioqatigiinnermi ippassaq sapaammi isumassarsiat ilagaat, piginneqatigiilluni Tuniniaanermi Ussassaariffimmik pilersitsinissaq, Taanna kalaallit suliffeqarfiinik aqqutissiuussisartuussaaq, ukiarulu pivisusunngortinneqariissasoq inassutigineqarpoq.

Isumasioqatigiit aamma anguniaqquaat Paamiut Pujooriviani avannaata ammassaanik pujoorisalernissaa. Neqi A/S-ip Narsamiittup savat, tuttut umimmaallu neqaannik ukioq ataaseq qaangiuppat pølsiliortalersimassasoq aamma siunniunneqarpoq.

Nioqqutissat allat, tassalu sukkuaqqat nunatta naasuinik akuukkat kusanartumillu poortukkat pisiariumaneqarluartartuupput, taamaattumik isumasioqatigiit siunnersuutigaat Air Greenland nerisassianik ussassaarinermi ilaatinneqassasoq, ilaatigut takornariat timmisartumi ilaasut kalaalersunnitsunik ooqattaagassinneqartarnerisigut.

Isumasioqatigiit isumaqarput nunarput nunarsuup kangiani Asia-mi nunanisulli takornariaqarfissuartut takornarianut tuniniarneqassasoq.

Nunatta tunniussinnaasai atorlugit nerisassiat sassaalliutigiinnarnagit aammali pisiniarfinni, katersugaasivinni timmisartoqarfinnilu takornarianut tuniniarneqartalernissaat anguniarneqartussanngortut ilagaat.