Nerisassat pillugit pikkorissarput
Inuup misigissusai pingaarnerit tallimat tunngavigalugit
nunatta nerisassaatai atuisunut tunisassiortut soqutiginnilersitsisinnaapput.
Nerisassaatitta ineriartortinnissaannut isumasioqataasut 30 –it missaaniittut Inuussutissalerinermi Ilinniarfimmi Inuili-mi
Narsami tamakku ullumi sungiusarpaat.
Namminersornerullutik Oqartussat suliffeqarfiutaaneersut, neriniartarfiutillit, hotelini sulisut, nunalerinermik suliallit, savaatillit, ussassaarinermik suliallit, uummasut nakorsaat inuussutissarsiornermilu siunnersuisoqatigiinneersut inuup misigissusai pingaarnerit tallimat tunngavigalugit ullaarli sulilerput. Peqataasut gruppinut agguataarneqarput. Kalaallit Nunaanut eqqaanartunik ujarlerput tusaasatik, isigisatik, naammasatik, misigissutsitik mamassutsinillu malugisaatsitik aallavigalugit isumassarsiorlutik.
Misigissutsit atorlugit ”nunatsinnut eqqaanartuniippoq” Makka Heilmann Nielsen.
Siunertaavoq tunisassiortut imminnut nutarternissaat nunattalu tunniussinnaasaanik tunisassiatik amerlanerusunik pisisartoqalersissagaat.
Danmarkimi nerisassianik nutaaliorluni pilersaarusiortarfik Madeleine Narsami isumasiortitsivoq, tassani sulisut pingasut ilaapput, isumassarsianik ineriartortitsisartut marluk igasorlu.
Ineriartortitsisartoq Anna Bentzen oqarpoq, upperalugu takornariat nunatsinnilu pisisartut akisuunik pitsaasunillu nunatsinni nerisassianik pisisartoqarluassasoq.
Namminersornerullutik Oqartussani Inuussutissarsiornermi Pisortaqarfiup Kalaallit Nunaani takornariaqarnermi Inuussutissarsiornermilu Siunnersuisoqatigiit isumasiortitsineq piviusunngorteqqullugu suliakkersimavaa.
