Nerisassat akitsoriartornerat unikkallarnavianngissorineqarpoq

- Nunat Tamat aningaaserivissuat taamatut aarlerisaarivoq. Nerisassat akitsoriartuinnarmata nunarsuatsinni inuit 100 milliuunit nerisassaaleqillutillu piitsunngoriartuinnarnissaat annilaanngatigineqarpoq. Nunallu Tamat aningaaserivissuanni pisortaq, Robert Zoellick oqarpoq nunat pisuut ikiuuttariaqalersut, DR taama ilanngutassiivoq.
Allattoq Najaaraq Egede
apriilip 22-at 2008 12:16

Ukiup kingulliup ingerlanerani qaqorteqqasut, karrit majsillu 80 procentimi akitsorsimapput, naalagaaffinnilu piitsuunerusuni inuit 100 milliuunit naammattumik nerisassaqarnissaminnut akissaqanngillat, sapaatip akunnerata naanerani Nunat Tamat aningaaservissuanni pisortaq, Robert Zoellick uppernaanerani ataatsimiinnerminni taamatut oqarpoq. – Ajornartorsiutit ilorraap tungaanut aallarallarnavianngillat, naatsorsuinerillu naapertorlugit ukiut marlussuit nerisassat akii suli qaffakkiartuinnarallassapput tamatumalu kingorna akit apparialaarsinnaassagaluarput 2015-illi tungaanut akit 2004-mi akinit appasinnerulernavianngillat.

Nerisassat akitsoriartornerannut inuit neqitortartut amerliartuinnarnerat pissutaaqataavoq,

Naalagaafiillu killit nerisassanik ikummatissiortualernerat aamma pissutaaqataammat naalagaaffiit pissuujunerusut naalakkersuisui ikiuinialeqqullugit qinnuigineqarput.

- Maannakkorpiaq 500 milliuuni dollarsinik ikiuiniarnissamut atorfissaqartitsivugut, siunissarli eqqarsaatigalugu iliuuserisassavut pilersaarusiortariaqalerpavut, soorlu atuarfinni nerisitsisinnaanerit naalagaffiillu piitsuunerusut naasorissaasuisa inerititaasa qanoq annertusineqarsinnaaneri eqqarsaatigalugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq