Nerisassaataat nukkassaatinik akoqaqaat
Kiniiserit nerisassaataat nalinginnaasut nukkassaatinik akoqangaarmata, aappaaguagu 2008-imi Kina-mi illoqarfiit pingaarnerssaani Beijing-imi Olympiadimi unammersuartoqalerpat nukkassaatinik atuisimasutut pasisat ikittuinnaanavianngillat. Kiniiserit naasorissaasuisa nersutaatitik nukkassaatinik annertuumik akulinnik nerlersortarpaat, olympiadeqarneranilu misissuinermi ulapputtoqarnissaa ilisimagineqarsinnaavoq,
Yang Shumin Kinami nukkassaatinik ilisimannittoq nutaarsiassaqartitsivimmut AFP-imut oqarsimavoq. Taama ernumassuteqarneq patsisissaqarluarpoq kiniiserillu naalakkersuisuisa qullersaannnut anngunneqarsimalluni, siornatigut Kinamiut olympiade-ni unammineranni nukkassaatinik atuisimanerannik misissuinermi pisortaasimasoq maannakkullu Kinami naalakkersuisunut inuussutissat/nerisassat pillugit siunnersorti Yang oqarsimaneragaavoq. Ajornartorsiut tamanna anigorniarlugu Kinami naalakkersuisut killilersuinissaminnut iliuuseqarput, nerisassat olympiadeqarfissamut eqqussuunneqartut killilersorneqarlutik teknikilu atorlugu nakkutilliissummik pilersitsisoqassalluni.
