Nerisaqarneq timillu aalatinnera
Nerisaqarnermut siunnersuisoqatigiit nerisarisat pillugit innersuussutaat quliusut saqqummersinneqarput.
Nerisassat peqqinnartut timillu aalatinnissaata sammineqarnerunissaat Siunnersuisoqatigiit kissaatigaat. Allanngorartunik nerisarnissaq, kalaaliminertortarnissaq, ullut tamaasa paarnanik naatitanillu nerisarnissaq, iffiassanik aseqqorluttunik akuukkanik suaasaliassanillu nerisarnissaq, orsortorpallaannginnissaq sukkutunnginnerunissarlu kiisalu sodavandip saftillu imermik taarsernissaat inassutigineqarput. Ullut tamaasa sivikinnerpaamik nalunaaquttap-akunnerani ataatsimi aalasarnissaq nerisarisartakkallu eqqarsaatigilluartarnissaat aamma siunnersuutigineqarpoq.
Nerisarisat pillugit siunnersuusiornermut pissutaavoq nunatsinni nerisarisat, nunani killerni pissutsit assigalugit, annertoorujussuarmik sukkumik orsumillu akulinnik nerisaqalerneq aammalu timip aalatinngippallaarnera takussutissaqalersimammata.
Inuussutissat assigiinngitsut amerliartornerisigut periarfissat amerliartorsimapput, atuisorlu isumaqarsinnaasarpoq nerisassat peqqinnartut ilisimanissaat toqqarnissaallu ajornarnerulersimasoq. Nerisarisartakkat allanngorsimanerat ullumikkut ilaatigut takuneqarsinnaavoq oqimaappallaartut sukkornermillu nappaatillit amerlanerulersimanerisigut.
Nerisaqarnermut siunnersuisoqatigiit nerisarisat pillugit siunnersuutaasa quliusut aallakaatinneqarnerat KNR TV-kkut ataasinngorpat aamma aallartissaaq.