Neriorsuuterpassuit, aningaasartassaammi?

- Tulluusimaaqaanga. Naalakkersuisooqatigiinnissamik isumaqatigiissut nunatsinnik katersuutsitsisussaq ineriartortitsinermillu aallartitsisussaq saqqummiussinnaagakku tulluusimaaqaanga.

Naalakkersuisut arfineq pingasunik ilaasortaqarput, taakkunanngalu marluinnaat Inatsisartuni sulinermik misilittagaqareersuullutik, misilittagaqanngitsuugaluartulli Aleqap piareeqqaneri qularutiginngilaa.

- Naalakkersuisunngortut toqqissisimanartilluinnarpakka, pikkorissorsuupput tulluusimaarutigeqaakkalu, Aleqa Hammond oqarpoq.

Naalakkersuisooqatigiit anguniagassaannik saqqummiussinermi aamma ersersinneqarpoq aningaasaqarnikkut akisussaassuseqarnissaq naalakkersuinngortut pingaartittupilussuugaat. Neriorsuuterparpassuit saqqummiunneqarput taakkuli tamaasa qanoq aningaasalersorneqarnissaat eqqaaneqanngilluinnarmat tamanna nalorninarpasippoq. Aleqa Hammondilli aningaasaqarnerup sianigilluinnarneqarnera naqissuserpaa.

- Aningaasatigut nammineersinnaassuseqalernissarput kissaatigisupilussuuarput, peqatigisaanillu aamma suliffissaaleqinerup annikillisarneqarnissaa qulakkeerniarlugu ilungersortussaavugut sulisinnaasullu sulilerseqqinneqassapput. Nunatsinni entreprenøritut anersaaqarneq nukittorsassavarput, aamma suliffeqarfiit mikinerit inuiaqatigiinni sanaartorfigineqarnerannut akisussaaqataatissavagut.

Aallartisaarusunnerullu annertusarniarneqarnera Atassutip siulittaasuata Gerhardt Petersenip Atassutip anguniagaatut isigaa, qanorli aningaasalersuisoqarnissaa erseqqissumik oqaatigisinnaanagu. Pingaarnersiuisoqartariaqarnissaanik oqarpoq, suulli ilanngartuiffigineqassanersut suli aalajangiiffigineqarsimanngitsoq Gerhardt Petersenip aamma oqaatigaa.