Neriorsuuteqartoqaraluartoq paamaarussisoqarpoq

Nuummi meeqqat sumiginnakkat pillugit nalunaarusiami saqqummeqqammersumi saqqummiunneqartut tupaallaatigalugit Ilaqutariinnermut Naalakkersuisoq Tommy Marø sapaatip akunnera matuma siuliani neriorsuuteqarpoq, meeqqanik sumiginnakkanik kommuneqarfiit sullissinerminni ikiorserneqarnissamik pisariaqartitsippata, naalakkersuisut ikiorsiinissamut piareersimasut, tamannali Nuummi borgmesterip Agnethe Davidsen-ip apeqquserpaa.

- Soorunami taama oqariartuuteqarnera qujarullugu neriuinnassaagut ilumoorunneqartoq, aammali apeqqutaavoq suut qinnutigissanerigut.

- Ilimaginngilara assersuutigalugu inunnik isumaginninnermut ilinniarsimasunik qulinik aqagu qinnuteqaruma taakku pissarsiarissallugit, imaluunniit meeqqanut inissiiffissanik nutaanik sisamanik pisariaqartitanik pinissarput ilimaginngilara.

Nuup Kommunea ilaqutariinnut sullivimmik meeqqanut katsorsaanermik aamma ingerlassaqartussamik pilersitsivoq, sullissiviup piaartumik atuutsilersinneqarniarnera Namminersornerullutik Oqartussanit kinguarsarneqartoq Agnethe Davidsen oqarpoq.

- Taassuma atulernissaanut akuersissut ulloq manna tikillugu pissarsiarisimanngilarput. Paasiniaagatta ilisimatinneqarpugut akuersissut immaqa ukioq ataaseq utaqqissagipput. Taamatut qisuariaateqarnerat akueriumanagu KANUKOKA-mut qaqippara, tassanilu paasillugu kommuneqarfinni allani tamanna aamma ajornartorsiutigineqartartoq, Agnethe Davidsen oqarpoq.

Naalakkersuisut siulittaasuat Hans Enoksen aamma Ilaqutariinnermut Naalakkersuisoq Tommy Marø tamanna pillugu allagaqarfigisimanerarpai piaarnerpaamik aaqqiissuteqaqqullugit.

- Malittarisassat tamaasa malillugit sullissisup atulernissaa piareersimalluinnarpoq, taamaallaat akuerineqarnissaa utaqqiinnarparput. Taamaattumik akuersaaruminaatsorujussuuvoq, ajornartorsiut taama annertutigitillugu ukioq ilivitsorsuaq kommunit utaqqisassappata.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat