Neriorsuut Naalakkersuisooqatigiit puigugaat

Tamannali piviusunngortinniarlugu Naalakkersuisut iliuuseqalersaarnersut pillugu apeqqummut suli akisoqarsimanngilaq.

Naalakkersuisunut siulittaasoq, Kuupik Kleist imaluunniit Attaaveqarnermut Naalakkersuisoq Jens B. Frederiksen, inatsisartut ukiaaneranni ataatsimiinnerat innersuussutigalugu apeqqummut akissuteqarusussimanngillat.
Ukiut pingajuat affaq ingerlareerpoq, naalakkersuisooqatigiinngortut Inuit Ataqatigiinnit, Demokraatinit kiisalu Kattuseqatigiit Partiiannit inuttaqartut isumaqatigiissuteqarmatali.

Taamaalinerani Inatsisartut sisamariarlutik ataatsimeereersimalerput maannakkullu tallimassaata ingerlanneqarnera naammassilerlugu. Aammalumi ullormut oqaluuserisassat misissuataarneranni "Umiarsualivik Akitsuusersuiffiunngitsoq" pillugu Naalakkersuisunit suli siunnersuutigineqanngitsoq takuneqarsinnaavvoq.

Naalakersuisooqatigiinnissamik isumaqatigiissut naapertorlugu, akileraatit akitsuutillu qaffannissaat Naalakkersuisunit isumaqatigineqanngilaq, taamaattumillu Nunatta Karsianut isaatitsinerunissaq anguniarlugu marluinnarnik periarfissaqarpoq.

 - Siulleq tassaavoq inuussutissarsiuteqarnerup ineriartortinneqarnissaanut pitsaanerpaamik atugassaqartitaanissaat, Kalaallit Nunaata aningaasaqarnerata annertuseriarnissaanik periarfissiisussaq. "Umiarsualivik Akitsuusersuiffiunngitsoq" tassunga attuumatinneqassaaq, isumaqatigiissumi taama allaqqavoq.
"Umiarsualivik Akitsuusersuiffiunngitsoq" Inuit Ataqatigiinnit 2009-mi qinersinissaq sioqqullugu nassuiarneqamat isumalluarfigineqarsimagaluaqaaq.

 - Ungasinngitsukkut Sullualuup umiarsuarnik usisaatinik aqqutigineqartalernissaa ilimagineqarsinnaavoq. Aqqut taanna atorlugu ingerlaarnermi, imaatigut angalanermi sapaatip akunnera ataaseq marlulluunniit, taamaalillunilu aningaasarpassuit sipaarneqarsinnaapput. Talittarfik akunniffiusartussaq suliffippassuarnik annertuumillu ineriartornissamik sumiiffinni inuussutissarsiuteqartunut umiarsuarnik inuttaanillu sullissisunut pilersitsisussaanerat, 2009-mi Namminersorneq pillugu taasinissami ilaatigut Inuit Atatqatigiit  qineqqusaarutiginikuuvaat.

"Umiarsualivimmik Akitsuusersuiffiunngitsumik" pilsersitsinissaq, akunniffimmilluunniit talittarfiliornissaq, usilersoqqeriarluni ingerlaqqinnissamut, nalinginnaasumik eqqussuinermi akileraarutinik akileraarusiinngikkaluarluni umiarsuaatileqatigiinnut
periarfissiisussaagaluarpoq.