Neriorsuilluarnermi Kalaallit Nunaanni pissartanngorniunneq
Qinersisartut ukiuni tulliuttuni sisamani partiit pilersaarutaannik tusarusuttut katersortarfimmut takkussuussimapput. Saamerliuniat Patii Inuit qallunaatut qinersisartunik ataatsimiititsisoqaraangat aallartitaqarneq ajortut ilimagineqareersutut aallartitaqanngillat, Kattusseqatigiilli isumasiuinerit naapertorlugit Inatsisartuni ilaasortaatitaqaannarusukkunik nutaanik qinersiseqartariaqartut aallartitaqannginnerat tupaallaatigineqarpoq.
Tusarnaartut arlallit kalaallit oqaasiisa oqaatsit aappaattut atorneqarnissaat, Nunatsinni suliniutigineqanngeqisoq pillugu apeqquteqartarput, partiilli arlaannaallunniit kalaallisut oqalussinnaalernissamut qanoq periarfissiinissamut innersuussuteqanngillat.
Partiit sisamat tamarmik nersualaarlugulu isumaqatigiissutigisatuaat tassaavoq, suliariniakkanut annertuunut atatillugu suliaqarnissaminnut qinnuteqartut qinnuteqaataannik immikkut ilisimasallit arlaannaannulluunniit atassuteqanngitsut misissuitinneqarnissaannik tusarnaartut ilaata siunnersuutigisaa. Immikkut ilisimasallit akissarsiaasa suliffeqarfinnit akuerineqartunit akilerneqartarnissaat partiinit tamanit taperserneqarpoq.
Taassuma saniatigut ineqarniarneq, ilinniartut inissaqartinnerat imaluunniit taakkua amigaataanerat, innarluutillit atugaat kiisalu innuttaasut atugarliortut pillugit politikerit oqallipput. Ataatsimiititsinerup ingerlanerani partiit aallartitatik paarlaatsippat, taamaammallu qineqqusaartut sassartut assigiinngiiaarluarlutik. Politikerinilli nuimasunik Atassutip IA-lluunniit peqataatitaqannginnerat eqqumiigineqarsinnaavoq. Aleqa Hammond aamma Jens B. Frederiksen peqataapput, massa Kupiik Kleist aamma Maliina Abelsen sapaammi ualikkut tusarnaartuuinnarusunnerusut.
Naggasiutigalugu tusagassiortutut misilittagalittut eqqumiigineqarsinnaavoq, partiit annerit marluk imminut nakkarsaallutik piffisssamik taama atuitiginerat, namminneq sunik sulissuteqarniarnerlutik eqqartornagu. Kingullermik qinersisoqarnerata kingorna naalakkersuisooqatigiilersut pillugit partiit taakkua annerit marluk akornanni aaqqiagiinngittoqarnera innuttaasut kikkulluunniit arajutsisimanavianngilaat. Uangami qularinnngilara, akerlerisat sullissinerlunneranniit siunissamilu sullissinerlutussaasorineranniit, partiit qanoq pitsaatigisunik sulissuteqarsinnaanerat qinersisartut tusarusunnerussangaluaraat.
