Neriniartarfinni sulisut IWC pillugu: Asuli pineq

Nunatta amerlanerusunik arfattassinneqarnissaa, Arfanniarneq pillugu ataatsimiititaliarsuup, IWC-p, itigartippaa. Itigartitsinermulli atatillugu tunngavilersuutiginiarneqartut Nunatsinni neriniartarfiit tupigusuutigaat.
Allattoq Mads Lynge
juulip 08-at 2012 13:37

Hotel Qaqortumi igasoq Andre Nørgaard ima oqarpoq:

- Uanga isumaga naapertorlugu asuli oqalunneruvoq. Arferup neqaa Kalaallit Nunaanni mamarineqaqalunilu pingaartinneqartorujussuuvoq, taamaammat arferup neqaanik sassaalliisoqarsinnaasoqartariaqarpoq. Arfanniarsinnaanissamik killilersuiniarnerat taamaammat aamma ajornartorsiutinngorsinnaavoq, Hotel Qaqortumi igasoq Andre Nørgaard oqarpoq.

Arferup neqaa Hotel Qaqortumi septembarip tungaanut sassaalliutigineqarsinnaassaaq, kingornali peerneqarumaarluni. Pisiumasunulli sassaalliutigineqarsinnaanissaa ammaffigineqarpoq.

- Arferup neqaanik sassaalliisoqartarnera nuannarisorujussuuaat. Arferup neqaa Kalaallit Nunaanni tamani tamaani sassaalliutigineqartarpoq, takornariallu kalaaliminernik sapinngisamik assigiinngitsorpassuarnik nerisaqarsinnaanissartik ujartortarpaat, Andre Nørgaard oqarpoq.

Taanna Ilulissani Hotel Arcticimi neriniartarfiup pisortaanit Ulrik Sørensenimit tapersersorneqarpoq:

- Takornariat amerlanersaat arferup neqaa mamarisaqaat, ulluinnarnilu nerisartakkaminnit allaanerusumik nerisaqarsinnaanissartik nuannarisaqaat. Ikittuinnaat mamarivallaarneq ajorpaat, Hotel Arcticip neriniartarfiani pisortaq Ulrik Sørensen oqarpoq.

Arferup neqaa 100 aamma 150 kiilut akornanniittoq hotelini taakkunani ukiup ataatsip ingerlanerani sassaalliutigineqartarpoq, Ulrik Sørensenilu Andre Nørgaarditut isumaqarpoq IWC-p isornartorsiuinera ilisimatuussutsikkut tunngavissaqanngitsoq:

- Asuli oqalunneruvoq. Piviusorsiunnginnerullunilu tunngavissaqanngilaq. Isummanik taamatut saqqummiussineq piviusunik tunngavissaqanngilaq, Ilulissani Hotel Arcticimi neriniartarfiup pisortaa Ulrik Sørensen KNR-imut oqarpoq.

Arferup neqaanik sassaalliuteqartarnertik, Hotel Sisimiuni pisortap Anette Lingsip oqaatigaa, pingaartumik Europamiunut sassaalliisarlutik.
Arferummi neqaanik amerikamiunut sassaalleerusunneq ajorput. Anette Lingsip oqaatigaa amerikamiut arferup neqaanik nerisaqarusunneq ajorput, uumasunik imarmiunik miluumasunik taakku nerisaqarnissartik paquminartutut isigisarmassuk.