Neriniartarfik NOMA pitsaanerpaat ilaattut toqqarneqarpoq

Neriniartarfik NOMA nunarsuarmi neriniartarfinni pitsaanerpaat normu 15-iattut toqqarneqarpoq. Neriniartarfimmilu ittuusoq, Lau Richter, oqarpoq, toqqarneqarnertik nuannaarutigeqalugu - qularutiginngilaa kalaallit pissaritaat toqqarneqarnerminnut pisooqataalluinnartut.

Danmarkimi neriniartarfiit nuimanersaat Illu Atlantikumi inissisimasoq, nunarsuarmi neriniartarfinni nuimanerpaat 15-iattut Londonimi ippassaq unnukkut toqqarneqarpoq.

Neriniartarfimmi ittuusoq, Lau Richter oqarpoq, ippassaq unnukkut tusarlerneqaramik soorunami nuannassimallutik. Ullaarlugooq iterami aatsaat paasilerlugu susoqarnersoq, aamma nuannaarnerujussuup tikissimavaa. - Soorunami kusanartumik peqqissaartumillu nerisassiortarnerput toqqaanermut peqqutaavoq, aammali nerisassanik allakkajaanik kusanarluinnartumik sassaalliisarnerput isiginiarneqarpoq, Lau Richter oqarpoq.

Kalaallit nerisassaataasa pisooqataalluinnarnerat aamma oqaatigaa. - Kalaallit Nunaanneersunik nerisassiassanik suli amerlanernik atuisinnaagaluaqaagut,- taakkuuppummi aamma pisooqataalluinnartut kusanartumik maanna toqqarneqarnitsinni Lau Richter oqarpoq.

Nunarsuarmi neriniartarfinni nuimanerpaatut toqqarneqarpoq spaniamiut neriniartarfiat tusaamasarsuaq: El Bulli.