Assi: KNR

Neriniartarfik kangerlummiittoq nersornaatisisoq

Kangerluup iluani isikkivigissumi pisanik nutaanik nerisassianik nereqatigiinneq nuannersuuvoq. Qooqqut Nuan-imillu piginnittoq Mads Bek taamatut periarfissaqartitsinini pillugu GrønlandsBANKEN-ip Inuussutissarsiornermut aningaasaateqarfiata aallarniisumut nersornaasiuttagaanik ukioq manna tunineqarpoq.

Aallarniisoq ukioq manna nersornaammik tunineqarnissaminut tallimanngormat Nuuk Centeriliaqquneqarami nuannaarpoq tupaallassimaalaarlunilu.
 
- Assut tulluusimaarpunga nuannaarlungalu, pitsaasumimmi suliaqarneq allanit maluginiarneqarangaat nuannertuaannarpoq, Mads Bek oqarpoq.

Foto: Lars Gaasvig

Inuussutissarsiormullu aningaasaateqarfiup siulittaasuata Kristian Lennertip nersornaasiineq ima tunngavilersorpaa:

- Mads Bek nersornaammik tunineqarpoq, aallarniisutut piumassuseqarluarluni eqiasuillunilu ukiuni kingullerni, Nuup Kangerluani Nuummit 50 kilometerinik ungasitsigisumi, neriniartarfimmik pilersitsilluni ingerlatsilersimanini pillugu. Taamatut immikkuullarissuseqartumik tunngaveqartumik ingerlatsineq immikkuullarilluinnartumik piginnaaneqarnissamik pisariaqartitsivoq. Siulittaasoq ilaatigut taama tunngavilersuivoq.

Mads Bekilli Qooqquni neriniartarfiuteqarneq unnuisarfiuteqarnerlu nammineq isumassarsiarinagu erseqqissaatigaa.
 
- Uanga nammineerlunga isumassarsiarinngilara, oqarpoq.
 
Nersornaaserneqartoq oqaluttuarpoq 1974-imili isumassarsiarineqartoq, maannalu inissisimaffigisaani taamani akunnittarfiliortoqarluni, taannali 1992-imi ikuallattoq.

- Akunnittarfik taanna 70-ikkut naalernerini igasunngorniarfigaara, Mads Bek oqarpoq.

AAMMA ATUARUK INUIT Quality Clothes akissarsitinneqartoq

Mads Bekkip akunnittarfik, siornatigut nukappiaqqanut angerlarsimaffittut atorneqartoq, ikinngutiminit pisiaraa. Pisiariumallugulu ikinngutiminut sianerami qisuariaataa nuannaarutigisimanerarpaa.
 
- Taamaattoqarsinnaasoraa, aammami nalunnginnamiuk sumut atorusunneriga, neriniartarfinngortikkusukkigami isertuussaanngimmat. Kikkunnummi tamanut eqqartortariarakku uannut tuninissaa akueraa, Mads Bek taama oqaluttuarpoq.
 
Nersornaatillu uppernarsaataa neriniartarfimmi nivinngarneqassaaq, Mads Bekkillu allanut kajumilersitsisinnaanissaa neriuutigaa, periarfissat iluatsissinnaasut takusinnaagunikkit aallartisaallutik. Suna tulliullugu suliniutiginiarnerlugu aallartisaasup oqaatiginngilaa, isumassarsiarpassuaqarnerarporli.
 
- Nutaaliorusulluta eqqartortuarparput, aallartikkusutagut amerlaqaat, tamakkuli aamma piffissaqarfigalugillu nukissaqarfiginissaat aamma pisariaqarpoq, Mads Bek oqarpoq.
 
Nersornaat 25.000 koruuninik aningaasartaqartoq 2017-imi Arctic Dreamimut 2018-imilu atisaliorfimmut Inuit-mut tunniunneqarpoq.

 

Qooqqut nuan

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat