Neriniartarfik Ajamut ammaqqippoq
Cafémik siornatigut attartortup, Steffen Jensenip, aningaasat kaaviiaartikkuminaatsillugit Ajamut-mi ullut tamaasa kalaaliminertortitsisarnini oktobarimi taamaatittariaqarpaa. Tamannali tassa Kalaallit Illuutaata maanna nangippaa.
- Illu katersuuffiusarmat taamaaliorpugut, inuimmi nerisinnaanissartik naatsorsuutigisarpaat. Inuit uagutsinnut isiginnittaasaannut tamanna pisariaqarluinnarpoq, pisortap tullersortaa, Niels Ole Jensen, oqarpoq.
Nerisassanik sassaalliisarnissaq Kalaallit Illuutaata ajunaarutigissagaluarlugu pisariaqarsoraa. Nerisassalli aallaqqaammut akitsorneqartariaqarput, puugutaq ataaseq 75 koruuneqassalluni. Cafép ammasarnera aamma sivitsorneqarpoq, kalaalimerngillu kissartut saniasigut qallersukkanik patitsitanik, tassa sandwichinik, kinguleqqiutinik, naatitanik kaaginillu nioqquteqassaaq, cafémi nioqqutit taamaalillutik assigiinngisitaarneruniassammata.
Soraarnerit klubbii qallunaallu Kalaallit Nunaannik soqutiginnittut neriartukulalernissaat Niels Ole Jensenip neriuutigaa.
