Neriniartarfiit marluk matuneqarput

Namminersorlutik Oqartussat Inuussutissatigut Nakkutilliisoqarfianit suliaq ilungersunartutut nalilerlugu naqissuserneqarpoq.

- Pisoq ilungersunartuuvoq, ilaatigut akuersissummik qiinnuteqartoqarsimannginnera pissutaavoq, tassa imaappoq inuussutissalerinermut akuersissuteqanngitsoq ingerlatinneqarsimavoq ilaatigullu matusinerlu toqunartunissimasoqasinnaaneranik pasitsaassaqarneq pissutigalugu pivoq, Uumasut nakorsaat Raiku Sarvijoki oqarpoq.

Inuussutissanut Nakkutiliisoqarfimmi Uumasut nakorsaata, Raiku Sarvijoki-p oqarnera naapertorlugu nakkutilliinermut atasumik misissuisoqareerneratigut qaqutiguinnaq taama pisoqartarpoq.

Pisumili uani pissutsit arlaqartut pisariaqalersippaat, neriniartarfinnik marlunnik piginnittuusut akuersissummik atuuttumik pigisaqalernissaasa saniatigut aamma annertunerusumik ininik iluarsaassisariaqassasut nerisassanik tuniniaaqqilinnginnerminni.

Namminersorlutik Oqartussatnit naqissuserneqarpoq, pineqartartut tassaasut Cafe Puisi aamma Cafe Pølsemik, nunatsinni ukiorpassuarni inuussutissalerinermik ingerlataqarsimasumit Leong Enterprisemit pigineqarput.

Aammattaaq Ilulissani, qanittumi oqartussanit misissuiffigineqareerlutik suliffeqarfiup neriniartarfii marluusut piumasaqaatinut angummassimasutut nalilerneqarlutik ingerlaqqissinnaanngortut ilaatigut tassannga ingerlanneqarput.

Maniitsumi suliassamut tunngatillugu uumasut nakorsaata Raiku Sarvijoke-p eqqiluisaarnermut tunngasut annertunerusumik iserfigerusunngilai, kisiannili akuersissut pigineqanngitsoq kisimi uani pineqanngimmat naqissuserlugu.

Aammattaaq oqaluttuaraa, sapaatip akunnerani kingullermi suliffeqarfiup qerititsivianut misissuiartorniartillutik Maniitsumi Politiiniit ikiorserneqartariaqarsimallutik.

Namminersorlutik Oqartussat Inuussutissalerinermut Nakkutilliisoqarfianit ilisimatitsissutigineqarpoq, Cafe Puisip aamma Cafe Pølsemikkip ammaqqinnissa pisinnaassasasoq siusinnerpaamik  aatsaat ullut 14-t qaangiuppata, kisiannili tamanna pisinnaavoq aatsaat piumasaqaatit arlalippassuit piginnittuniit naammassineqareerpata.

Oqartussanit  unioqqutitsinerit pissutigalugit Leong Enterprise politiinut tunniutilersaarneqanngitsoq oqaatigineqarpoq.