Neqit nutaanngitsut Danmarkimut eqqussat

Danskit suliffeqarfiutaat, Københavnimi Islands Bryggemiittoq, Finn Food, tyskit neqiutaannik qanganitsersimasunik Danmarkimut eqqussisimasoq, inuussutissanik aqutsisoqarfimmit uppernarsarneqarpoq.

Suliaq politiinut tunniunneqareersoq, aqutsisoqarfimmit nalunaarutigineqarpoq.

Kukkukuuaqqat neqaannik Tysklandimi Münchenimi suliffeqarfiit ilaanniit ukioq manna juulimi aggustimilu tikisitsisimavoq. Oqartussaasut suliffeqarfimmi ullut arlalialunnguit matuma siorna pakasaallutik misissuigamik, neqit qanganitsernikut 50 tonsit missaanniittut naammattorpaat, paasitinneqarpullu Finn Food naalagaaffinnut Tysklandimut atasunut arlalinnut tunisaqareersimasoq, nunanullu EU-mut ilaasortaasunut ikinnerpaamik arfineq-pingasunut, aamma Danmarkimut, tunisaqareersimasoq.

Akiligassat suliffeqarfimmut Islands Bryggemiittumut nassiussuuneqarsimagaluarput, Finn Foodili Islands Bryggemi, Inuussutissaqarnermut Aqutsisoqarfimmi imaluunnit nalunaarsuutini allani nalunaarsorsimanngilaq.

Suliffeqarfik nassaarineqassappat akiligassat aqqutigalugit politiit paasissutissanik pissarsinissartik neriuutigigaluarpaat.