Neqinik tunisassiorneq aasamut aallartissinnaavoq
Canadamut USA-mullu angallannikkut niuernikkullu attaveqaatit ineriartortinneqarnissaat pillugu Naalakkersuisut qanorpiaq takorluugaqarnersut inatsisartuni ullumi ataatsimiinnermi Inuit Ataqatigiinniit apeqquteqaatigineqarpoq.
Canadamut USA-mullu niueqateqarneq aallartillualerpoq, aasarulu tuttut neqaat Canadamut tunisassiarineqarsinnaanissaat ilimagineqarsinnaasoq, Aningaasanut nunanullu allanut Naalakkersuisoq Josef Motzfeldt oqarpoq.
- Naalakkersuinikkut ajornartorsiutitaqarpat, naalakkersuisut taanna aaqqinniagassarissavaat, soorlu akitsuutitigut imaluunniit neqaarniarfiit pineqarpata. Toqoraaviit Canadamiut Amerikamiullu piumasaqaataannut naammassinnissimasinnaasariaqarput. Naalakkersuinikkut uagut suliassarput tassaavoq, aporfiusinnaaasut aaqqinniassallugit. Niuernertavianut tunngatillugu, aporfiit qaangiuppata, niuertut sinnera isumagissavaat. Kujataani tuttuutilik Canadami neqaarniarniarluni ukioq kingulleq aallartikkaluarpoq, Canadamili pisortat, nunatsinni pissutsinik ilisimasakinnerat pissutaalluni tamanna piviusunngunngitsoorpoq. Ukioq mannali Canada-mut USA-mullu ornigussimavunga, atorfilittat Naalakkersuisullu ataatsimeeqatigiartorlugit. Ilisimatitsissutigaara toqoraaviutigut EU-mi maleruagassat malillugit ingerlammata, taamaammat ilimagineqarpoq aasaru neqinik niueqateqarsinnaaneq akuerineqassasoq, taamaasillutalu tuttut umimmaalluunniit neqaanik tunisassiulersinnaaneq aallartissinnaalissaaq, Aningaasanut nunanullu allanut Naalakkersuisoq Josef Motzfeldt oqarpoq. Taanna aamma oqarpoq aasaru tuttut neqaanik Canada-mut tunisassiaq siulleq tunineqarsinnaalereersimanissaa ilimanartoq.
