Neqi A/S-ip akiitsuutinut akiliinnginnissamik qinnuteqaataa itigartinneqartoq
Toqoraavik Neqi A/S aningaasakilliortoq savaaqqanik eqqussinermi kilomut 25 koruuninik akiliisarpoq, akitsuutinullu taakkununnga ukiumut 3,5 millionit koruuninik aningaasartuuteqartarluni.
Akitsuutillu nammineerlutik tassa akilertussanngorpai.
- Allanngortitassaanngitsumik itigartitsissutigineqarpoq, taamaaliorumanngillat, Per Jensen oqarpoq.
Neqi A/S-illu akitsuutinik akiliinnginnissamik qinnuteqaataa itigartitsutigineqarsimasoq, aningaasaqarnermut naalakkersuisup, Randi Vestergaard Evaldsenip uppernarsarpaa.
Aamma atuaruk Neqi A/S ikioqquvoq
Qinnuteqaammi akuerineqaraluarpat suliffeqarfiit allat akitsuutinik akiliinnginnissamik piumasaqassasut, Naalakkersuisoq nassuiaavoq.
- Neqi A/S-i angerutitsigu isumaqassagami suliffeqarfiit allat assingusut eqqussuinermut akiitsuummut pisussaajunnaartinnissaannut isumalluartilissagivut. Tamannalu aamma Nunatta karsianut isertitassaraluit amerlasuut annaassavavut. Aammalu Neqi A/S-i akuerigutsigu allallu itigartillugit assigiinngitsitsineq piulissaaq, Randi Vestergaard Evaldsen oqarpoq.
Aningaasat naammanngitsut
Savat toqoraavimmut tunineqartut ukiuni kingullerni ikiliartorput, savaatillillu arlallit akiitsoqarujussuarnerat savaatilinni kinguaariit nikinnissaannut aporfiuvoq.
Neqi A/S-ip Namminersorlutik Oqartussallu kiffartuussinermik isumaqatigiissutaanni toqoraavik ukiumut 2 millionit koruuninik aningaasaliiffigineqartarpoq, pisortarli Per Jensen naapertorlugu akiliutigineqartartut Neqip aningaasaqarniarneranut naapertuutinngillat, savat toqoraavimmut tunineqartartut 18.000-inik ikileriarsimammata.
- Aningaasanik, sanaqqiinermut atugassanik, Namminersorlutik Oqartussanit pivugut. Sanaartornermulli aningaasanut 60 millionit koruuninut atoriikkatsinnut sanilliullugit taakkua naammanngillat, Per Jensen oqarpoq.
Aamma atuaruk Pilersaarusiorluarneq savaatilinngortussanut qulakkeerinnittartoq
Neqi A/S-illu akiitsuisa, 70 millionit koruuniusut, Namminersorlutik Oqartussanit isumakkeerneqarnissaat toqoraaviup Neqip siunnersuutigigaluarpaa.
- Massakkut isummerfigisinnaanngilara. Una suliaq sukumiisumik misissorluaqqaassavara, aammalu qanoq ilioriartoqassanersoq misissorluaqqaartariaqarami, massakkut oqaaseqarfigisinnaanngilara, Randi Vestergaard Evaldsen oqarpoq.
Aamma atuaruk Savaaqqat Islandimeersut Narsami suliffissaqartitsisut
Inuussutissarsiorneq misissuiffigineqartoq
Savanillu inuussutissarsiorneq maanna misissuiffigineqartoq, Randi Vestergaard Evaldsenip oqaatigaa.
- Ingerlatsiniarneq ajornartorsiortoq iluarsigassaqartorlu takusinnaavarput. Taakkualu eqqumaffigineqarput misissorneqarlutillu, aningaasaqarnermut naalakkersuisoq Randi Vestergaard Evaldsen oqarpoq.
