Nepalimi pikititsiniat naalakkersuisooqataalerallarput

Nepalimi pikititsiniat naalakkersuisullu ukiuni arlalinni isumaqatigiinngereerlutik ullumi naalakkersuisooqatigiikkallarniarlutik isumaqatigiipput.

Tappavani ministeriuneq Girija Prasad Koirala parteeqataalu arlallit pikitsitsiniat siuttuannik Prachandamik nalunaaquttap akunnerini qulini isumaqatiginninniareerlutik nalunaaruteqarput sapaatip akunnerini tulliuttuni pingasuni atuuttussamik tunngaviusumik inatsisiliorallarsimallutik naalakkersuisooqatigikkallarniarlutillu.

Naalakkersuisooqatigiikkallarnerup nalaani qinersisitsinissaq, tunngaviusumik inatsisiliornissaq kiisalu Nepalimi kunngeqaqqilissanersoq eqqartorneqartussaassaaq. Prachanda oqarpoq 2007-imi marsimi apriilimiluunniit qinersititsisoqassagunartoq.

Kunngip Gyanendrap aqutsinera pillugu innuttaasut sakkortuumik akerliussutsimik takutitsisaqattaareersullu inatsisartut apriilimi kunngip atorunnaarsippai qanittukkulli tunniusseqqimmat Nepalimi eqqisseqatigiinnissaq anguniarlugu suleqatigiittoqalerpoq.