Nepal naalakkersuisortaarput
Allattoq Mads Lynge
Nepalimi naalakkersuisut siuttuat naalakkersuisunik nutaanik ullumi ilisarisitsivoq, pikitsitsiniallu Mao-mik malinnaasut naalakkersuisunngortuni peqataatitaqarput.
Naalagaffiup sakkutuuisa pikitsitsiniallu akornanni ukiuni kingullerni qulini akersuuttoqarsimavoq, maannali naalakkersuisooqatigiinnissamik isumaqatigiissuteqartoqarluni.
Akersunnerit inuit ikinnerpaamik 13.000-it inuunerinik naleqarsimapput.
Maanna naalakkersuisunngortut juunip qaammataata tungaanut aqutsissapput, inatsisartunillu qinersisoqareerpat nunap tunngaviusumik inatsisissaa naaammassiniagassanut ilaassalluni.