Nelson Mandela: "Sydafrikami pisuut piitsunik avitseqateqarlik!"
Sydafrikap præsidenterisimasaa nunarsuarmi tamarmi nalunnginneqarluartoq Nelson Mandela ullumikkut 90-inik ukioqalerpoq.
Allattoq Jaaku Lyberth
juulip 18-at 2008 15:52
Mandela ilaquttani ukiut 27-it parnaarussaanermini najorsinnaasimanngisani, ilagalugit nunaqarfimmi inunngorfigisami eqqaani Qunu-mi 90-inik ukioqalernini nalliuttorsiorpaa.
Nelson Rolihlahla Mandela, Madiba-mik sydafrikami taaguuteqartoq, nalliunnerminut atatillugu nunarsuarmioqataasunut kissaateqarpoq :” Sydafrikami inupassuit pisoorsuupput, pisoorsuillu taakkua pisuussutitik Sydafrikami piitsunik avitseqatigisinnaavaat, piitsummi taakkua piitsuunertik qaangersinnaasimanngilaat !” Nelson Mandela nalliunnerminut atatillugu taamatut oqarpoq.
Inuuissiortoq pilluaqqoriallaataa radioaviisi tamaanga naavoq, aqagu ualikkut pingasunut radioaviiseqaqqissaaq sapaatip akunnera naanersiorluarniarisiuk unnussiorluarsilu.
