Nelson Mandela napparsimavoq

92-inik ukiulik Mandela marlunngornerup unnuaani unitsinneqarpoq. Nakorsamit immikkut ilisimasalimmit misissorneqarsimavoq, puammigut tarrarsortissimalluni. Qanorli innera annertunerusumik ilisimatitsissutigineqanngilaq.

Præsidentiusimasup, eqqissinermullu suliniuteqarluartutut Nobelip nersornaasiuttagaanik nersornaaserneqarsimasup, utoqqalisup taassuma Johannesburgimi napparsimmavimmut uninnera tusarliunneqarmat, politiit sakkutuullu napparsimmaviup eqqaani aqqusinerni isumannaallisaalerput.

Ærkebiskoppiusimasoq, Desmond Tutu, Mandelalu sapaatip-akunnerani kingullermi naapisimaarput, Mandelalu ukiuminut naleqqiullugu peqqeqisoq Tutu unnersiorpoq - utoqqalilernerali aamma eqqaallugu.

- Angummit taassumannga sunaana utaqqigipput? Qaqugumut uumaannarnissaa kissaatigigaluarparput, kisianni soorunami qanorluunniit pisoqarsinnaavoq, Desmond Tutu oqarpoq.

Præsidentiusimasup qanigisai arlallit napparsimmavimmut pulaareerput, Mandelalli qanoq inneranik paasisat annertunngillat.