Nelson Mandela Canadami naggueqatitsinnit eqqaaniarneqarpoq
Nelson Mandelap ukiuni 27-ni parnaarussaaqqareernermi kinguninngua, Canadamut tikeraarpoq. Akilinermi Eqqaluit tikippai, 1990-mi juuliugaa. Mandela Canadaliartilluni timmisartoq ilaaffia orsersorniarluni Eqalunnut unnuaannakkut mippoq, sivikitsumillu Eqalunniilluni.
Eqalunnut aqqusaarnini Inunnillu naapitsisimanini pillugit, Mandelap ullorsiutaani atuarneqarsinnaavoq, issittumi Inuit naapinnissaat takorloorsimanngikkaluarini, tupigusuutiginerarlugulu allappoq issittumi Inuit kinaanini ilisimammassuk.
Canadami Inuit kattuffissuata præsidentiata, Terry Audla-p tusagassiutinut ippassaq nalunaarnermini oqaatigaa, Inuit pisinnaatitaaffeqarnissaat Mandelamit ilinniagaasimasorlusooq aamma pingaaruteqarluartutut oqaatigalugu, saammaasseqatigiinnissaq Mandelamit Inuit ilikkagaqarfigisimagaat.
- Canadap Inuillu akornanni saammaasseqatigiinnissamik suliap ingerlanneqaleruttorfiata nalaani, Mandelap taama siunniussaqarsimanera, Inuit akornanni pingaaruteqarluartuusoq, Terry Audla oqarpoq.
Avatangiisit pillugit Sydafrikami Johannesborgimi, 2000-imi pisumi isumaqatigiinniarnermi, Inuit aallartitaasa Mandela taamani naapippaat. Taamanin ICC-p præsidentiata, Sheila Watt-Cloutier-ip oqaatigaa, Mandelap siuttuunermini Sydafrikami utoqqaat ilisimasaat pingaartikkai soorlu Inuit akornanni aamma utoqqaat pingaartinneqartaqisut, tamannalu Sheila Watt-Cloutier-ip nuannaarutigalugu taamani oqaatigaa.
