Nazistinut illersuisut siuariartorput

Tyskland-imi ingasaassiniarlutik talerperliuniat NPD-t, Tyskland-ip nunap immikkoortuani Mecklenburg-Vorpommernimi kommuninut qinersinermi kommunini aqqaneq-marluusuni sisamanut sapaatiummat isertitaqarput. Demokratiskimik ingerlatsineq iluanit akiorniarneqassasoq neriorsuutigaat.

Qinigaasut arfinillit ilaatigut qineqqusaarnermi, nunanut allamiunut nikaginninnertik isertuuttarsimanngilaat.

- Partiinit allanit isertuunneqartartut ammasumik saqqummiuttarnissaat anguniarparput, partiip NPD-p pingaarnertut qinigassanngortitaat Udo Pastörs oqarpoq. Taakkua aamma oqarput innuttaasut aqunneqarsinnaanngitsut peqqarniisaarfigalugit iliuuseqarfigineqartassasut.

2002-mi nunap immikkoortuisa inatsisartuinut qinersisoqarmat NPD-kkut isertitaqarput, 1968-imiilli ilaasortaqarsimanngeriarlutik.

NPD-p siulittaasuata Udo Voigt-ip oqaatigisarsimavaa Adolf Hitler politikeriusoq nuimasorsuaq, tamannali aalassassutigineqaqimmat Udo Voigt ingasattajaarunnaarsisimavoq.

Qinersinermi uani inuusuttuaqqat 16-nik ukiullit qinersisinnaanerat, NPD-p iluaqutigilluartarsimagaa, Ritzau allappoq.

Tyskit isertortumik paasiniaasartui oqarput NPD, tassaasoq juutinut akerliulluinnartoq, allamiunillu ajattuisuusoq.

Partiip NPD-p inerteqqutinngortinneqarnissaa, ukiut pingasut matuma siorna sulissutigineqaraluarpoq iluatsinngitsumilli. Partiinik ingasaassiniarluni talerperliunerusunik nungutitsiniarsinnaaneq ilimagineqarsinnaanngitsoq, Naalagaaffimmi pissutsinut ministeri Wolfgang Schäuble oqarpoq.

Talerperliuniarpallaarnermilli akiuiniarluni Naalakkersuisut amerlanernik aningaasaliiniarlutik neriorsuipput.