Navaranaaq isiginnaartitsissusiarineqalerpoq

Navaranaamik oqaluttuaq tassaavoq, kalaallit qallunaatsiaallu akornanni avissaartuutsinnissamik siunertaqarluni Navaranaap qangarsuaq pissusilersorneranik oqaluttuaq.

Tamassuma isiginnaartitsissusiarineqarnerani atortussat tamarluinnarmik Nunatsinni suliarineqassasut, Nukaaka Coster-Waldau allappoq. Taamaaliortoqarnissaanik pilersaarnermi kalaallit inuiaqatigiit peqataatinneqarnissaat siunertaavoq, tassa sulisartut, suliffeqarfiit allallu peqataatinneqarnissaat siunertaalluni.

Isiginnaartitsinissamik isumassarsisut siunertaannut ilaavoq, isiginnaagassiap takuteqqaarnera Nunatsinni pissasoq.

Isiginnaagassiamut peqataarusullutik nalunaartut ilagaat, Nunatta Isiginnaartitsisartui, kulturikkut illorsuaq, Katuaq, Islands Symfoniorkester aamma Islandimiut Isiginnaartitsisartui.

Soqutiginnillutik nalunaartunut ilaapput Det Kongelige Operakor, Danmarkimeersut.

Qallunaat naalagaaffianniit kaammattorneqarnissaq siunertaralugu, isiginnaagassiamik suliaqartut folketingip kulturi pillugu ataatsimiititaliaanik januaarip ulluisa 23-anni ataatsimeeqateqarput. Tassalu tamatuma kingorna suliniuteqartut aningaasaateqarfimmik aallartitsillutik.

Isiginnaagassiamik takutitseqqarneq 2015-imi upernaakkut pissasoq naatsorsuutigineqarpoq. Tamatumalu kingorna Islandimi, Danmarkimi, Sverigemi aamma Norgemi takutinneqarnissaa siunertaalluni. Aamma Alaskami, Canadami Tysklandimilu takutinneqarnissaa siunertanut ilaavoq.

Nunat tamakku saniatigut EU-mi nunat ataasiakkaat isumaqatigiinniarfigineqarnissaat siunniunneqarpoq.