Aleksej Navalnyj pineqaatissinneqarnerminik unioqqutitsisimasutut ukiuni marlunni qaammatinillu arfinilinnik parnaarussaaqqavoq.Assi: Moscow City Court/Reuters/Ritzau Scanpix

Navalnyj pisinnaatitaaffinnik innarliisimasutut Ruslandimi naalakkersuisunit unnerluutigineqartoq

Ruslandimi illuatungiliuttut siuttuat, Aleksej Navalnyj, peqquserluttunut akiuiniarnera innuttaasut pisinnaatitaaffiinnik innarliisoq, Ruslandimi paasiniaasartut ataatsimiititaliaat isumaqarput.

Ruslandimi illuatungiliuttut siuttuat,  Aleksej Navalnyj, maanna parnaarussaaqqasoq, inatsisinik unioqqutsisimasutut pasineqaqqippoq parnaarussaaneralu sivitsorneratarsinnaalluni.

Ruslandimi annertuunik peqquserluttuliortoqarsimatillugu ataatsimiititaliaq taama nalunaaruteqarpoq.

Suliniaqatigiiffimmik arlaannaannulluunnit attuumassuteqanngitsumik pilersitsisimasutut, innuttaasut pisinnaatitaaffiinnik innarliisimasutut inatsisinillu unioqqutitsinissamik kaammaattuisimasutut, Aleksej Navalnyj unnerluutigineqarpoq.

AAMMA ATUARUK Navalnyj nerisaqqilersoq

Unnerluussissutigineqartut nutaat, Navalnyjip peqqusserluttuliortarnerup akiorneqarnissaanut, naalisarlugu FBK-mik taaguuteqartumik aningaasaateqarfiliorsimaneranik, tunngaveqarput.

Ruslandip præsidentia, Vladimir Putin, taassumalu naalakkersuisui peqquserluttuliorsimasutut Navalnyjip pisuutittarpai.

Akerliussutsimik takutitsinissamik kaammattuisimasutut peqataasimassutullu Navalnyj suliniaqatigiiffillu FBK pisuutinneqarput, taamaaliornerillu unioqqutitsinerusut Ruslandimi paasiniaasartut ataatsimiititaliaat taama oqarput.

Suliniaqatigiiffk FBK russit eqqartuussisuinit junimi inerteqqutigineqalerpoq ingasattajaarniatullu naqissusserneqarluni.

AAMMA ATUARUK Navalnyj-p suliniaqatigiiffiata suliani tamaasa unitsikkallassagai

Eqqartuussivimmi aalajangiisoqarmat, suliniaqatigiiffik FBK tassanilu ilaasortat nunat allamiut kilitsissiaattut pisortanit taaneqarput.

Navalnyj pineqaatissinneqarnerminik unioqqutitsisimasutut ukiuni marlunni qaammatinillu arfinilinnik parnaarussaaqqavoq.

Navalnyj ilisimajunaaqqalluni Tysklandimi napparsimmavimmiinnerata nalaani, Moskvami politiinut nalunaarsimannginera pillugu parnaarussaaqqavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl