Nattorallip angissusaa rekordiuvoq
Nattoralik arnaviaasoq ukiup aappaata affaanik ukioqarunartoq, isimi illuatigut tappiitsuugunarpoq. Taanna innarluuteqarnermigut nammineerluni piniarsinnaanngikkaluarluni silutortarnermigut uumaannarsinnaasimasoq, Lars Maltha Rasmussenip Pinngortitaleriffimmeersup oqaatigaa.
- Taamaakkaluartoq nattoralinnit allanit anneruvoq. Suluisa isorartussusiat 253 cm-iuvoq. Nattoralinnilu uuttorneqarsimasuni rekordiusumit 8 cm-it missaannik sului takinerupput, taamaattumik pisortatigoortuunngitsumik rekordiliisoqartoq, Lars Maltha Rasmussenip oqaatigaa.
Nattoralik toqungasoq taanna Pinngortitaleriffimmi qerititsivimmiitinneqarpoq, nattorallillu allat ilanngullugit, nattorallit Nunatsinniittut akuutissanik avatangiisitsinniittunik qanoq sunnerneqartigisimanerinik misissuinermi ilanngunneqassalluni.
Pinngortitaleriffimmiillu ima kajumissaarisoqarpoq:
- Nattoralimmik, kissaviarsummik imaluunniit kiinaaleeqqamik imaluunniit timmissamik eqqissisimatitamik allamik toqungasumik asimi naammattoorsissagaluaruit qimaannarnianngikkukku Pinngortitalerffimmut tunniutissavat. Timmissat piniaqqusaanngitsut eqqissisimatitaalluinnarput, taama Pinngortitaleriffimmiut nalunaarput.
Nattoralik Nuummi uumasuutit inaanni nerisinniarneqaraluarpoq, nukillaarsimavallaarninili pissutigalugu toquinnarluni.