Natsersuit nassitsissutilerlugit imaq kissassusersiorneqarpoq
Ilisimatuut Tasiilap ungasinngigisaani kangerlorujussuarmi Sermilimmi immap kissassusaanik uuttortaareernerminni taama inerniliipput.
Ilisimatooq Aqqalu Rosing-Asvid Pinngortitaleriffimmeersoq misissuinernut peqataavoq, taannalu ima oqarpoq:
- Puisit nassitsissutilernerisigut immap kangerluup paavaniittup kissassusaa paasivarput. Nassitsissutinik natsersuarnut ikkussivugut, ukiorlu ataaseq malinnaavigalugit. Immap kissassusaa taamaalilluta paasivarput, Aqqalu Rosing-Asvid oqarpoq.
Silalli pissusaata allanngoriartornera pillugu ullumi ilisimasatsinnut inernerit nutaat allanngortitsisinnaanersut ilisimatuup sukumiinerusumik nassuiaatissaqartinnginnerarpaa:
- Tamatuma qanorpiaq allanngortissinnaaneraa ilisimanngilara, immalli kissatsikkiartorneranut pissutaaqataasinnaasoq paasivarput, Issittumilu silap pissusaata ataatsimut isigalugu kissatsikkiartorneranut tamanna aamma takussutaasinnaasoq paasivarput, Aqqalu Rosing-Asvid oqarpoq.
Immap kissassusaanik misissuinerit aasaru nanginneqassapput. Kingullermik misissuisoqarmat natsersuit 2008-mi nassitsissuserneqarput, aasarulu misissuisoqalerpat natsiit nassitsissutilerneqassallutik:
- Misissuinerit soorunami nangikkusuppavut, natsiillu Ilulissat eqqaaniittut nassitsissutilerniarpavut. Natsiimmi iluliarsuit akornanniikkajunnerusarput. Nassitsissutilerlugit immap kissassusaa misissorniarparput, soorlu aamma immap tarajoqassusaa misissorniaripput. Iluliarsuit immallu qanoq sunneqatigiittarnersut taamaasilluta ilsimasaqarfiginerulerniassagatsigit, Pinngortitaleriffimmi ilisimatooq Aqqalu Rosing-Asvid oqarpoq.
Aqqalu Rosing-Asvid puisit pillugit immikkut ilisimasaqarpoq.