Afghanistanimi pikitsitsiniat Talebanit saassussisarnitik sakkortusiartortippaat unitsinneqassappatalu Nato-p sakkutuuinik amerlanerusunik sakkutuuliinissaq pisariaqarpoq.
Ullumi Nato-p Canadami ataatsimiinnissaani USA-p erseqqissarniarpaa nunat Nato-mut ilaasortat amerlanerusunik sakkutuuliinissamut pisussaaffeqarmata – tassa ingammik Afghanistanip kujataani sakkutuut amerlineqartariaqarmata.
Talebanit Natop sakkutuuinut saassussisaqattaartut Afghanistanimi maanna ajornartorsiutaanerpaapput. Tusaasinnaasavut tassaapput Natop sakkutuui Hollandimiut Talebaninit qoqassiillutik saassussisunit tupaallatsinneqartut.
Ukioq kingulleq Talebanit pikitsitsiniat aatsaat taamak amerlatigisunik Natop sakkutuuinut saassussisaqattaarput, ilaatigut imminut toqoriaatigalutik qaartartumeerisunit aqqusernillu killingini qaartartumeerisaqattaarlutik. Nato-mit naatsorsuutigineqarpoq upernaap aasallu ingerlanerani saassussisarnerit ingatsikkaluttuinnassasut. Taamaattumik USA-mit kissaatigineqarpoq Natop sakkutuuinik amerlanerusunik Afghanistaniliartitsisoqassasoq, ingammik nunap kujasinnerusortaanut nakkutilliiartortussanik. USA nammineerluni Afghanistanimi Irakimilu naammattunik sakkutooqartitsereerpoq. Taamaattumik USA-p illersornissamut ministeriata Robert Gates-ip nunat Nato-mut ilaasortat qinnuiginiarpai amerlanerusunik sakkutuuleeqqullugit. Nunat pineqartut tassaapput Tuluit Nunaat, Canada, Australia, Holland, Rumænia aamma Danmark.
USA-p nunanit angisuunit soorlu Frankrig-imit Tysklandimiillu ikiorserneqarnissani naatsorsuutigissanngilaa, taakkumi Afghanistanip kujataanut sakkutuuliinissartik kissaatiginngilaat siusinnerusukkullu amerlanerusunik sakkutuulinissaq apeqqusereernikuuaat.
Nunat Nato-mut ilaasortat illersornissamut ministerii Canadami Quebec-imi ataatsimeeqatigiissapput. Canadallu Talebanit saassussisaqattaarnerat qanittukkut misigereerpaa, tassami ullut kingulliit sisamat ingerlaneranni Canadamiut sakkutuui arfineq-pingasut aqqusernit killingini qaartartumeerinernit toqutaammata.
